HOH a confirma: Un atake cibernetico a contamina netwerk di Hospital
ORANJESTAD – Manera cu noticiacla.com a informa caba diamars, tabatin un problema serio na hospital, relaciona cu nan sistema di netwerk, cu lo a keda afecta door di un posibel hacker. Hopi informacion (of casi nada) tabata bin afo. Pero diamars atardi, hospital a duna e splicacion. Aki nan a admiti e problema y a bay mas den detayes kico tur a sosode.
E PROBLEMA
Segun hunta di directiva, dialuna marduga departamento di IT di Dr. Horacio E. Oduber Hospital a bati alarma paso a constata un movecion straño den e netwerk di Hospital. Di biaha a yama e team di IT hunto y a yega na e conclusion cu e netwerk di Hospital a ser infecta cu un virus miho conoci den e mundo cibernetico como un “ransomware”. Como precaucion a kibra tur conexion externo pa asina contene e virus mas cu ta posibel. Di biaha Hunta di Directiva a tuma contacto cu Ministerio Publico cu a sa di indica e pasonan necesario cu mester tuma den casonan asina. Un team di diferente stakeholder externo a bini hunto y desde ayera ta hasiendo todo por todo pa yega na un solucion teniendo semper e cuido di pashent na prome luga.
Mester enfatisa cu e cuido medico ta e parti cu mas Hospital ta boga pe y di biaha a crea diferente team interno pa asina percura cu e cuido di e pashent no ta sali perhudica di e atake cibernetico aki. Hospital desde mas di un aña pasa a bay over riba digitalisacion di informacion di pashent. E informacion medico di pashent aki ta warda riba “server” na Kansas City cual no a ser infecta pa e virus cibernetico aki. Esaki paso manera departamento di IT a bati alarma a kibra tur conexion externo pa contene e virus cibernetico aki.
Na momento cu aña pasa e digitalisacion di informacion di pashent a tuma luga a traha riba proceduranan si en caso no tin acceso na e sistema (por ehempel si no tin coriente of internet cay). Den e caso aki no tin acceso na e sistema y pues di biaha a bay over riba e proceduranan aki cu ta consisti di entre otro registra tur informacion di pashent manual.
Si awo mester bay den historia medico esey no ta un posibilidad manera ya a menciona a kibra tur conexion externo pa contene e virus cibernetico y proteha informacion di pashent. Tur pashent cu a yega Hospital cu tabatin mester di cuido agudo a ricibi esaki. Actualmente ta trahando riba un plan di emergencia temporal pa asina por sigui registra y yega alabes na informacion di pashent te ora yega na un solucion a largo plaso.
Desde cu e atake aki a tuma luga tur colega di Hospital a pone man na obra sin pense dos biaha pa asina yega na un solucion. Manera cu a yama stakeholders di diferente instancia nan a habri man pa yuda den e problematica aki. Di awo palabra di gratitud pa cada persona cu di un of otro manera ta aoprtando y trahando duro pa soluciona e problema aki.
Varios buelo di Merca a yega Aruba cu retraso awe pa mal tempo
ORANJESTAD – Debi na mal tempo pa e parti Noord Oost di Merca diaranson (sneeuw mas tanto), como 5 buelo di aeroliñanan Mericano a yega Aruba cu retraso. Ta trata di buelonan di New York, Boston, y Newark. Aeropuerto di Aruba a informa di e situacion y a pidi tur hende tene cuenta cu e situacion aki pa cu e retraso necesario. E retrasonan ta varia di mei ora pa un ora y mei. E buelonan tabata e.o. B6 557 (JFK), B6773 (Boston), UA 1040 (Newark), DL484 (JFK), UA 1042 (Newark).
Dialuna ta cuminsa cu remodelacion di edificio di DOW, DIP y DLV
ORANJESTAD - Dialuna awo 16 di december 2019 lo cuminsa cu remodelacion di e asina yama Infra gebouw, den cual tin e departamentonan DOW Aruba, DIP y DLV. Nan tur lo haya un balie central y tambe oficinanan amplio unda cu lo por atende publico. Alabes a anuncia cu den cuadro di digitalisacion DOW Aruba a haya su propio website. E website akinan ta duna informacion tocante eorganisacion, nos proyectonan actual y tambe noticianan di ultimo momento. E compania SIM Caribbean tabata responsabel pa traha e website.
Coöperatie VGZ a bishita AZV pa Universal Health Coverage Day
ORANJESTAD - En conexion cu e ‘Universal Health Coverage Day’ cual ta tuma luga 12 di december, Organo Ehecutivo AZV a organiza un programa completo di workshop y seminario pa su empleadonan y stakeholders. Dentro di e programa a incorpora e bishita di Tom Kliphuis, presidente di e Hunta di Directiva desde september 2014 di VGZ. VGZ ta un cooperacion di seguronan di cuido medico cu ta duna servicio na 4 miyon asegurado. Haciendo esey, VGZ ta e di dos seguro di cuido medico mas grandi di Hulanda.
ImSan a cuminsa realisa operacionnan di catarata y pronto di retina
ORANJESTAD – ImSan a cuminsa realisa operacionnan di catarata y pronto di retina! Asina minister di Salud Dangui Oduber a informa e siman aki. E ta mustra den un comunicado cu dia 6 di december ultimo a tuma lugar e prome operacion di catarata na Instituto Medico San Nicolas (ImSan). Den pasado semper e operacion di catarata tabata tuma luga na Dr. Horacio E. Oduber Hospital. ImSan a conoce inversion y desaroyo cu a tuma luga pa e parti medico, den e inversion aki a inverti entre otro den e aparato di mas sofistica pa haci operacionnan di wowo. Danki na e inversion aki, awor por realisa e operacion di catarata na ImSan mes y esaki sigur ta un logra den cuido medico na Aruba. Awor cu tin mas sala disponibel pa operacionnan di wowo, esaki lo bay yuda na reduci e tempo di espera pa pashentnan cu ta wardando pa haci e dicho operacion.
Stichting Parkietenbos ta keha di holor malo y gas di Ser’i Teishi
ORANJESTAD - Holor malo y gas di Ser’i Teishi ta sigui afecta bida di habitantenan. Asina e fundacion di Parkietenbon ta bisa den un comunicado diamars. Segun e fundacion, mas di dos siman despues cu expertonan di exterior a bishita Ser’i Teishi pa asisti Serlimar pa remedia e situacion cu a surgi cu e deramento di e envirobales, ainda keto bay holor malo y posibel gasnan toxico ta afectando e habitantenan di e besindario. Stichting Parkietenbos tin cu enfatisa cu nunca antes e habitantenan a pasa den un situacion asina manera cu ta pasando actualmente. For di marduga y mainta trempan e habitantenan no por hala rosea di aire limpi, bo rosea ta wordo corta y bo ta ansha y haya tosamento y dolor di cabes.
David Passchier a huramenta como ambtenaar na Raad van Advies
Follow NoticiaCla
