ORANJESTAD - Mayan nos ta celebra 30 aña di Derecho di Mucha na Aruba! Tur persona bou di 18 aña ta wordo reconoci mundialmente como un mucha pa e tratado di Derecho di Mucha. Tur mucha tin e derecho di lanta den un ambiente feliz, caminda nan siguridad y bienestar ta na prome luga pa asina nan por desaroya y crece pa bira adultonan sano, exitoso cu por funciona positivamente den nan comunidad.
E tratado di derecho di mucha ta wordo ehecuta pa Comision Derecho di Mucha y diferente instancianan cu ta trahando duro pa asina brinda tur mucha na Aruba nan derechonan. Sociaal Crisis Plan, den colaboracion cu 20 socionan cu ta funciona den e sector social, salubridad, hudicial y educacion, ta trahando hunto cu representantenan di Unicef caminda e mucha y su derechonan ta keda central y ta para firme pa brinda e proteccion na cada mucha na Aruba.
Kico ta e Derechonan di mucha? Abo ta na altura di e derechonan di cada mucha? Akibou por lesa 10 di e 54 derechonan di mucha cu ta wordo trata internacionalmente;
1. Un mucha ta un persona bou di 18 aña
2. Tur derecho ta aplicabel pa tur mucha
3. E interes di mucha mester ta central
4. E estado/pais mester boga pa e realisacion di tur e derechonan
5. Mayornan ta guia e yui ora di eherce su derechonan
6. Cada mucha tin derecho riba bida y desaroyo
7. Cada mucha tin derecho riba un nomber y nacionalidad
8. E estado/pais mester proteha e identidad di e mucha
9. Cada mucha tin e derecho pa lanta y crece cerca su mayornan
10. Mucha y mayor tin e derecho di ta hunto como famia
Tur mucha tin nan derecho y ta keda na nos como adultonan responsabel pa dunanan e guia y e sosten, e cariño y proteccion, e motivacion y comprension pa asina nan por crece den un ambiente caminda nan bienestar y siguridad ta central. Nos no mester lubida cu nos muchanan di awe ta nos futuro di mañan y hunto como un comunidad nos por pone como meta pa proteha tur nos muchanan.
Pa mas informacion di e derechonan di mucha por bishita e pagina web di Derecho di Mucha na www.derechodimucha.org y tambe por haya mas informacion di e Convenio di derechonan di mucha na www.unicef.org. Pa mas informacion di actividadnan en conexion cu e Siman di Lantamento di Mucha por bishita e pagina di facebook di Sociaal Crisis Plan na @scparuba.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.
ORANJESTAD - Entrante 18 di april 2024, pa 9or di anochi via TeleAruba, Aruba completo lo por cuminsa presencia e serie documental ‘Blue Lizard Effect’. Un serie documental revolucionario cu ta profundisa su mes den e mundo fascinante di Aruba, pero di un angulo diferente. E serie ta explora e concepto energetico di felicidad y e conexion profundo cu e cultura, e hende, y naturalesa di e isla.
ORANJESTAD - Na Aruba ta conoci cu 131 ta un organisacion cu banda di su propio proyectonan, ta desaroya y implementa proyectonan pa diferente organisacion Internacional aki na Aruba. Na 2023 131 a ser acerca pa Pan American Development Foundation pa desaroya un proyecto cu ta stimula empatia bao di hobenan local y migrante pa cu otro.