ORANJESTAD – Tin un silencio hermetico na Hospital Horacio Oduber Hospital riba un caso di supuesto hacking, cu lo a afecta e operacion di netwerk di e hospital for di dialuna mainta caba. Informacion cu ta circula, pero cu noticiacla.com no por a confirma ainda precisamente, ta bisa cu tin un hacker (un persona cu por drenta den un sistema di computer no autorisa y haci daño) lo a drenta den e sistema di computer di hospital, y menasa di lo saca informacion crucial, si e no haya placa. Algo cu ta parse algo di pelicula. Noticiacla.com a compronde cu un ekipo di tecnico di e compania CERNER for di Merca ta na caminda pa Aruba pa atende cu e problema.
REACCION MINISTER
Minister di salud Dangui Oduber a indica na e portal aki cu e no ta na altura di nada. “Ami no sa, ni Raad van Bestuur ni Raad van Toezicht a informa mi esaki oficialmente. Tampoco mi a ricibi ningun yamada of cualkier otro forma di correspondencia pa pone ministerio na altura si esaki por ta e caso.” E mandatario a bisa. For di miembronan di Raad van Toezicht a compronde cu awe tardi tin un reunion unda cu mas informacion lo por sali afo. Tambe a tuma contacto cu directiva di hospital pero esaki no a reacciona ainda riba e preguntanan manda.
MENASA
E portal Aruba Native ta raporta cu tin un hacker cu a drenta (internacional) y cu e lo ta demandando un suma cuantioso di 250 mil dollar, sino e lo revela informacion crucial di pashent y mas dato sensitivo riba internet. E portal ademas ta raporta cu e sistema na hospital ta 'down' y cu tur hende lo a wordo puntra pa no usa computer ni telefon cu ta pertenece na hospital. Noticiacla.com no por a verifica e informacion aki, pero si a haya indicacion cu tin algo cu ta pasando riba e tema aki.
ORANJESTAD – Awe nochi Alto Comisario di polis Ramon Arnhem ta invitado di e programa Noticiacla LIVE. Durante e programa aki, e moderador y periodista Tito Laclé lo confronta e Alto COmisario cu varios tema skerpi, relevante y actual riba e tereno policial. Fuera di esaki, e audiencia tambe por haci pregunta durante e programa, via e pagina di Facebook di Noticiacla y nos lo haci e preguntanan aki tambe si nan ta relevante. Esaki no ta e prome biaha cu sr Arnhem ta bin. Bo por ta sigur cu hopi informacion balioso por sali for di e programa aki, cu manera semper, ta bira noticia nacional despues. E programa ta cuminsa pa 9’or di anochi, ta en bibo y lo pasa riba plataformanan di Noticiacla manera e Facebook page, Website y App.
ORANJESTAD – Den cuadro di e spirito di e proximo olimpiada na Paris, Francia, oficina di turismo di Aruba (ATA) a organisa su propio ‘weganan di verano’ e asina yama ‘Relaxathon. Pa esaki nan a uni forza cu un e 5 biaha atleta olimpico Shaun White, cu lo fungi como anfitrion di e prome evento Caribense di e tipo aki. E intencion ta pa atrae participantenan (turista) di tur parti di mundo pa bin beach di Aruba, y aplica nan capacidad pa relax, y bira e miho relaxer di mundo’.
ORANJESTAD - Dia 8 di mei 2024 Parlamento di Aruba lo trata e proposicion di ley pa legalisa matrimonio di mesun sexo. Segun e grupo di iglesianan Cristian di Aruba, tin indicacionnan fuerte cu mayoria di pueblo di Aruba kier mantene matrimonio den nos codigo civil como un union serio y sagrado entre un homber y un muhe. Si nos Parlamentarionan tene nan mes na e decision di Corte Europeo pa Derecho Humano anto nan lo yega na e conclusion cu no ta existi derecho humano pa hende casa cu un persona di mesun sexo. Legalisa matrimonio di mesun sexo kiermen ta duna un fabor na e personanan aki. Pero ley no mester ta basa riba fabor sino riba derecho. Parlamento no mester inventa un derecho cu no ta existi.