Sindicatonan lo reuni cu nan miembronan durante ora di trabou diahuebs

ORANJESTAD – Sindicatonan bringando pa indexering, lo ‘reuni’ diahuebs mainta awor cu nan miembronan riba e tema en cuestion. Mientras cu nan no ta usa e palabra accion, como cu e reunion aki ta tuma lugar durante ora di trabou, entre 9’or y 11’or di mainta na Wilhelmina Park, por considera esaki techicamente como un accion. Esaki lo ta e posibel prome accion, pendiente e decision di e miembronan riba e situacion cu tin actualmente. 

PENSAMENTO DI SINDICATO

Via un mensahe cu ta coriendo riba rednan social, e sindicatonan ta bisa cu ‘manera nos a informa den e ultimo reunion, e perdida di compra den añ 2018 tabata substancial y cifranan di CBS ta mustra cu na 2019 tambe lo tin mas perdida di compra. Pesey nos ta haci un yamada pa bo bin scucha pa bo mes, kico gobierno a ofrece pa yena buraco cu a wordo crea  den bo cartera’. 

E ULTIMO PROPOSICION

Tambe manera e portal aki a raporta anteriormente, e sindicatonanbringando pa indexering ta evaluando e proposicion ricibi pa gobierno diabierna mainta. Asina e sindicatonan a informa noticiacla.com diabierna merdia. A compronde cu nan no a keda mucho contento cu e e contenido ya cu e no ta mucho diferente di e proposicion anterior. Durante e encuentro mainta cu gobierno, nan a ricibi un contra proposicion manera cu el a priminti y a brinda oportunidad pa haci pregunta, segun e sindicatonan. Noticiacla.com a logra pone man riba copia di e proposicion nobo di gobierno. Entre e sindicatonan, SIMAR awor ta trahando riba un documento pa splica kico e proposicion di gobierno lo nifica pa un maestro. Segun presidente di e sindicato di SIMAR Josephine Albertus, a pidi e maestronan pa keda pendiente pa e splicaciona aki. 

E PROPOSICION

E proposicion dirigi na e 5 sindicatonan, ta encera entre otro un aumento di ‘gelijke toeslagen’ y mantene esaki na nivel di 2019 manera acorda den e protocol di 2014, pa asina crea un espacio pa duna un subida annual di .7% den salario den aña 2020 cu lo forma parti di e pensioen. E diferencia aki lo ta ekivalente na un balor agrega di .15%. Tambe gobierno ta dispuesto pa duna loke a propone den e carta di 25 di October 2019, cu ta ekivalente na 1%. Adiiconal ta instala de inmediato un commission mixto pa asina analisa recomendacionan adicional. Entre nan, e deseo pa introduci opcion di edad di pensioen mas trempan, mas balance entre trabou y bida familiar dus menos ora di trabou, posibilidad pa  empleadonan publico intercambia dia di vacacion cu otro empleado, y introduci recompense pa cada tanto luna sin cu a falta dia di trabou pa motibo di enfermedad. No a pone un fecha nobo pa reuni bek cu gobierno y no ta conoci ki dia sindicadonan lo reuni bek atrobe pa informa sea nan miembronan of comunidad riba e decision cu nan lo tuma finalmente