8 Psicologo (basico) di Aruba lo cuminsa cu estudio specialisa

ORANJESTAD - Dia 18 di november e estudio pa ‘GZ-Psycholoog’ (psycologo specialisa den salud) lo cuminsa pa nos islanan. Na e estudio aki, cu ta sumamente importante y desea na Hulanda, lo participa 18 persona di cual 8 psicologo y ortopedagogo di Aruba y 10 participante procedente di Boneiro, Curaçao y  Sint Maarten.

E specialisacion den psicologia  aki lo ta un granaporte na e calidad profesional di e ayudo psicologico aki na Aruba y lo forma un gran aporte na e sistema di ‘mental health’ cu Fundacion Respaldo a institui na Aruba.

Despues di finalisa e estudio intensivo aki, e 8 psicologonan di Aruba lo ta registra den e systema ‘BIG’ di Hulanda. Esaki ta nifica cu nan lo hiba un titulo responsabel y proteha cu ta valido na Hulanda tambe.

Un elogio grandi ta bai pa e director Eric Jansen y su staf di ‘Mental Health Caribbean‘ na Boneiro  y tambe pa e ‘Opleidingsinstituut Rino Zuid’ cu hunto a colabora pa trese e estudio renombra aki pa Aruba y e otro islanan.

Na Aruba, Respaldo ta e instituto, bishita y cualifica dor di ‘Rino Zuid’, y lo funciona como instituto educacional di practica pa e estudio aki.                               E estudio ta wordo carga dor di Fundacion Respaldo den colaboracion cu SVGA (Stichting Verstandelijk Gehandicapten Aruba). 

Tur respet ta bay pa nos 8 psicologonan cu lo cuminsa cu e estudio aki dia 18 di November. Nan lo haci esaki banda di nan trabou diario y esaki ta lo exigi algun aña di hopi estudio, training y desaroyo personal. 

Participantenan ta  4 psicologo di Respaldo, 2 di SVGA y 2 di Ministerio di Educacion. E 4 participantenan di Respaldo ta trahando na e seccion Policlinica pa psikiatria di mucha y hoben.

Fundacion Respaldo ta sumamente conciente di e importancia di estudionan bon cualifica cu ta duna hopi atencion na mucha y hoben, cu ta e futuro di nos pais Aruba.