- Presion di CAFt a pone gobierno kita 16 miyon pa RWZI di e prespuesto
- Presentadora di television Hulandes a tende di su Condecoracion Real mientras cu e ta na Aruba
- Condecoradonan a ricibi nan ‘cinta’ pa nan esfuerso y dedicacion boluntario na pais Aruba
- Conocido presentadora di programa Sinterklaas Journaal mester laga amputa su nanishi
- Cantidad di hende condecora na Corsou ta hopi menos cu Aruba e aña aki
Oduber: Argumento di Daphne Lejuez riba afvalstofheffing ta robez
ORANJESTAD – E ponencianan cu parlamentario (awor) independiente Daphne Lejuez a trece recientemente como argumento pakico e ley di Serlimar no ta bon, no ta cuadra. Asina minister di medio ambiente Otmar Oduber a bisa, den su prome reaccion directo riba e tema di retiro di Lejuez. Oduber a usa varios argumento, algun hopi personal, pero tambe partinan legal cu Lejuez a husa pa hustifica su desacuerdo. Ta trata di e asina yama ‘afvalstoffenverordening’ cu lo no tey, pa cual segun Lejuez, dificilmente bo por tin un afvalstof heffing (cobransa), y sigur no pa Serlimar. Oduber a refuta e argumento aki dialuna.
ROBEZ
Segun Oduber, citando varios fragment di ley existente di 2007, cu ta duna Serlimar e autoridad pa cobra pa recohemento di sushi. Segun Oduber, no mester di tin un afvalstofverordening pa por cobra pa sushi, mescos cu awor no tin un milieu verordening, siendo cu por tin milieu heffing pa algun tempo caba. E ley nobo di Serlimar ta mas bien aclaria ki ora por cobra y ki ora no por cobra esaki. Cu esaki, Oduber kier mustra cu Lejuez su argumento riba e parti legal no ta cuadra, y cu e ley di Serlimar ta corecto.
PERSONAL
Oduber ademas di clarifica e parti di e ‘heffing’, a bay mas personal tambe riba e parlamentario, usando su documento di Camara di Comercio pa prueba cu debidamente Lejuez ainda ta activo como un director di su propio compania, y ta cobrando clientenan, mientras cu e tin un salario como parlamentario. Segun Oduber, mester puntra presidente di parlamento si Lejuez a participa esaki, pasobra pa ley, si un parlamentario ta gana algo na banda, mester reduci esaki di su salario. Segun Oduber, tur esaki ta mustra cu e decision di Lejuez pa retira, ta uno personal, y no a tene cuenta cu interes general.
REUNI
No obstante tur e argumentacion y atakenan contra e parlamentario, el a confirma cu diamars awor pa 2’or, e lo topa e parlamentario pa un reunion pa asina e por duna mas clarificacion personalmente. Segun Oduber, ta despues cu el a anuncia diahuebs siman pasa cu e lo bin contesta argumentonan di Lejuez su retiro y problema cu ley, cu Lejuez diasabra ultimo a yame of manda un mensahe pa nan topa pa asina haya mas informacion riba e ley. Segun Oduber e no ta compronde pakico ta awor numa e ta pidi pa e reunion mirando cu ya caba Lejues a retira, pero asina mes a acepta pa topa cu Lejuez y duna mas informacion ainda riba e ley. E ta spera cu e logra convence Lejuez y kita tur inquietud extra cu Lejuez por tin pa cu e ley.
Presion di CAFt a pone gobierno kita 16 miyon pa RWZI di e prespuesto
ORANJESTAD – Presion di e colegio di supervision financiero CAFt a pone gobierno di Aruba kita 16 miyon florin presupuesta pa e planta di RWZI. Asina e mandatario a confirma diabierna despues di su reunion cu director di DOW, Marlon Croes. Durante e reunion cu a trata mas tema, tambe a trata e tema importante di RWZI, no solamente e plantanan na Bubali, sino tambe RWZI Parkietenbos y RWZI Zeewijk. A papia riba e retonan cu tin cu esakinan y e importancia y e urgencia cu tin pa e privatisacion.
Condecoradonan a ricibi nan ‘cinta’ pa nan esfuerso y dedicacion boluntario na pais Aruba
ORANJESTAD – Manera cu Noticiacla a raporta anteriormente caba, diabierna 26 di april, un dia prome cu Dia di Rey, 18 ciudadano di pais Aruba a ricibi un Condecoracion di Rey Willem Alexander. E momento aki, ta conoci como Ocasion General, y ta relaciona cu e cumpleaño di Su Mahestad, Rey Willem-Alexander, cu ta esun cu ta otorga e condecoracion na e personanan cu a duna un contribucion special na e sociedad. Riba e mainta aki, 16 di e condecoradonan tabata presente pa ricibi nan Condecoracion Real di Gobernador di Aruba, señor Alfonso Boekhoudt, kende a splica dicon e personanan aki a bin na remarke pa un reconocemento asina importante. Dos persona no por a ricibi nan condecoracion, entre nan Nicole Hoevertsz cu ta den exterior pa compromiso deportivo. Potretnan cortesia di gobierno di Aruba.
Video: Ryçond Santos do Nascimento ta considera su entrada den AVP como un eror
ORANJESTAD – Actual parlamentario independiente mr. dr. Ryçond Santos do Nascimento ta considera su decision pa subi lista berde AVP como un di su erornan cu e la comete den su bida. Asina e parlamentario a admiti na e periodista Tito Laclé durante e programa Noticiacla LIVE diamars anochi. E ta splica esaki den un fragment di e programa.
Minister a anuncia mando nobo temporal na Cuerpo di bombero
ORANJESTAD - Cuerpo di bombero temporalmente tin ekipo nobo di maneho. Por lo menos asina minister di husticia Rocco Tjon a anuncia diaranson mainta riba su pagina di Facebook. Esaki despues cu a manda esun cu tabata na cabes, Emilio Geerman cas recientemente. “Awe mainta nos a reuni cu e miembronan nobo di e management team di brandweer. Esaki mirando e ultimo desaroyonan” e minister a cuminsa na bisa.
Acuerdo di colaboracion entre instancianan di salud mental den CAS-BES reforsa
WILLEMSTAD – Recientemente durante un conferencia cu a tuma lugar na Corsou, diferente partner di salud mental (GGZ) den e Caribe Hulandes a logra adelanto den nan esfuerso pa intensifica e acuerdo di colaboracion titula ‘Dutch Caribbean Mental Health’ y a expresa nan deseao di formalisa esaki den un entidad huridico. Meta di ‘Federatie Dutch Caribbean Mental Health’ ta pa promove calidad di cuido di salud mental riba tur e islanan den Reino. E federacion lo facilita intercambionan di experticio di contenido y e parti organisatorio. Principalmente riba e tereno di calidad, desaroyo continuo, ley y regulacion y educacion.
Gobierno y CAFT ta den proceso pa reemplaza actual miembro pa Aruba ora su termino vence
DEN HAAG - E siman aki cu Minister Maduro di Finansa ta na Hulanda, e mandatario a reuni cu Presidente di CAFT, sra. Lidewijde van Olerongen. Minister Maduro a duna un update riba e trabounan pa mehora maneho financiero di Aruba y a repasa e proceso pa yega na un miembro nobo pa Aruba den CAFT ya cu e termino di sra. Helen van der Wal ta bay yega su fin na augustus e aña aki. E mandatario a combersa tambe riba e reglanan presupuestario y e maneho cu ta wordo traha pa trata cu surplus, ya cu pa basta aña Aruba a conoce solamente presupuesto cu deficit y awo Aruba ta trahando cu presupuesto cu surplus.
Follow NoticiaCla
