DOW: Lo cuminsa instala borchina di informacion riba Watty Vos Blvd

ORANJESTAD – Dienst Openbare Werken (DOW) a informa dialuna cu lo cuminsa instala borchina di informacion riba Watty Vos Blvd. Segun e departamento, durante di e ultimo dianan nan (DOW) a ricibi varios keho di automobilistanan cu ta confundi ora cu nan yega na algun rotonde. 

Esaki ta comprendible ya cu e caminda ta nobo y ainda e borchinan di informacion no a ser instala. DOW ta desea di informa comunidad cu na e momentonan aki e base pa e structura di e borchinan di informacion ta ser poni y dentro di un siman mas e borhinan lo cuminsa wordo instala riba e ruta di Watty Vos Blvd. 

DOW y Gobierno a mustra cu ta consciente di e situacion pero a opta pa habri e caminda mas trempan pa asina cuminsa brinda tur automobilista mas opcion pa escoge nan ruta ya cu e congestionamento riba cierto rutanan tabata birando mas druk. 

DOW ta gradici automobilistanan y comunidad di Aruba pa comprencion y pasenshi, y ta spera cu despues cu e concrete di e basenan a seca hopi bon cu por cuminsa instala e borchinan di informacion, cual tin un structura basta grandi y fuerte. Asina cu nan ta instala tur automobilista lo por maneha cu mas tranquilidad y lo sa na cua rotonde y bario nan a yega y cua ruta pa scoge trempan.