Banco social di asegurado SVB a lansa nan webportal MiSVb 2.0

SAN NICOLAS  – E banco social di aseguradonan (SVB) a lansa nan   webportal MiSVB2.0. diabierna ultimo. Minister encarga cu Salud Dangui Oduber tabata na e evento y a mustra positivo pa e logro aki “ Mi ta orguyoso di con e vision di 2020 pa SVB ta bayendo y cu tur cos ta canando segun plan” tabata palabranan di e mandatario.

Loke a sali afo di SVB ta cu tecnologia rond mundo ta avansa hopi lihe y pesey mes SVB mester a keda proactivo pa asina uza cambionan na benificio di SVB. Cu e cambionan aki segun informa, SVB lo funciona na un manera mas eficiente y cu transparencia pa e sociedad. SVB tin e deber pa administra e fondonan adecuadamente y cu confiabilidad, pa mantene e fondonan financieramente sostenibel.

E webportal, MiSVB 2.0, ta e prome paso solido pa SVB den e proceso di digitalisacion di nan servicionan. Mediante e plataforma digital aki, SVB ta comunica mas rapido y ta brinda su clientenan acceso na tur informacion cu SVB ta maneha den cuadro di e relacion SVB-cliente. Den SVB su vision 2020, SVB a propone su mes pa transforma di un organisacion tradicional, burocratico y cera pa uno moderno, accesibel y transparente. E medio pa logra e transformacion aki ta digitalisacion asina e mandatario a duna di conoce.

Innovacion por medio di digitalisacion ta forma parti importante di maneho di minister Dangui Oduber. E ta un forma pa traha mas eficiente y elimina burocracia y mehora servicio.