Caso Natalee Holloway ta haya plataforma nacional na Merca e siman aki

NEW YORK – E canal di television nacional Mericano ABC un biaha mas ta pone Aruba den luz negativo internacionalmente, cu e storia di desaparicion di e Mericano Natalee Holloway na Aruba na 2005. Loke ta haci esaki ‘noticioso’ of y importante, ta e canal y programa cu ta pasa e programa y e audiencia cu esaki tin. E storia riba su mes, no ta nobo, pero solamente e hecho cu e mama di Natalee Holloway a bolbe Aruba cu un ekipo di filmacion, y cu e programa riba un plataforma nacional Mericano, ta haci esaki algo ‘nobo’. Pa esnan cu no ta corda, 15 aña pasa Natalee Holloway a ‘disparse’ na Aruba cu a crea un ola di actividad mediatico internacional, poniendo Aruba den luz negativo. Holloway nunca no a wordo haya. 

COS NOBO

Entre e partinan ‘nobo’ di e documental aki, Beth Holloway e mama, awor ta bisa di ta wordo ‘acusa’ di ta e posibel motibo pa morto di e Peruana Stephanie Flores, otro dama cu tabata envolvi cu e sospechoso principal di desaparicion di Natalee, esta e Arubiano Joran vd Sloot. E mama ta splica asina con el a paga vd Sloot 25 mil dollar di avanse riba e suma total di 250 mil dollar pa divulga unda Natalee Holloway ta dera. Cu e ‘downpayment’, vd Sloot a ‘hui’ pa Peru, unda cu dado momento el a topa e Peruana  Flores cu el a termina ta mata despues. E pensamento segun Holloway, ta cu si e no a paga Joran e placa, Joran lo no a biaha pa Peru, y consecuentemente lo no a conoce Stephanie, te pa e mat’e. Como tal, tin hende ta culp’e di e morto. Vd Sloot ta sintando un castigo di prison di 28 aña na Peru pa e asesinato ey. E documentario den cual e raportahe aki lo pasa, ta e popular programa di investigacion 20/20 riba e canal di television ABC. (Na Aruba, canal 14 of 314(HD)). Wak e propaganda pa e programa AKI.