Proyecto di parkeermeter pega ainda pa cambio di ley

ORANJESTAD – E cambio di ley pa e proyecto di parkeer, tin e proyecto di parkeermeter tranca. E minister encarga cu e proyecto ta minister di Transporte, Otmar Oduber, pero su colega Benny Sevingera a a confirma dialuna pa NoticiaCla.com cu e proyecto di parkeermeter enberdad tin su retonan y cu no ta premira cu pa e aña aki ainda e por cuminsa ‘opera’, manera cu tabata e intencion inicial.

Manera ta conoci, gobierno algun tempo pasa a encarga Arubus pa tuma e proyecto bou di su encargo. Como tal a lanta ‘AruTram’ cu tin cu haci e trabou diario di opera esaki pa medio di personal cu tin cu controla e meternan y duna boet. E areanan specifica ta den centro di Oranjestad y tambe cierto parti di hotel na Palm Beach.

“A haya e business plan y aworaki Arutram ta bezig ta bestel e ekiponan pa nan cuminsa instala nan” Sevinger a sigura NoticiaCla.com. DOW lo ta encarga cu e ‘markering’ esta e zonanan unda cu e espacio di parkeer lo ta, y AruTram lo pone e meternan y opera esaki.

Pero ta e ley cu mester regula e parti legal, ainda no ta cla y mester percura pa esaki keda cla y bay parlamento. E ley aki ta duna e operacion legalidad pa hende cu haya ‘klem’, enberdad por wordo cobra un boet prome cu nan por ‘deshaci’ di e klem aki. E mandatario no por a duna un fecha di ki tempo esaki lo por keda introduci. No ta conoci cuanto parkeermeter tin pensa di uza ni tampoco e areanan specifico cu kier ubica pa esaki. Plan inicial tabata pa cuminsa cu e proyecto aki na comienso di e luna aki. Raad van Advies tambe a keha riba e proyecto aki su ehecucion. Primordialmente e hecho cu ta pone esaki bou di Arubus, siendo cu e meta di e compania di transporte no tin esey como su meta di operacion. No obstante e hecho cu a lanta un otro compania den Arubus mes, pa ehecuta esaki.