Colegio Arubano ta celebra 60 aña di existencia otro siman

ORANJESTAD - E añanan na scol secundario ta pa hopi hende un periodo di cual nan tin masha bon recuerdo. E ex-alumnonan di Colegio Arubano tambe ta recorda cu masha placer e tempo ey, cu tabata determinante pa nan futuro. Nan ta recuerdo di les for di e docentenan cu a inspira, e localnan, e pleinchi di scol, e actividadnan pafo di scol y tur amistad cu a nace durante e añanan aki. Nan ta spera cu abo tambe tin bon recuerdo di Colegio Arubano y cu un laso duradero a surgi entre abo y nan scol.

REUNION: 23 DI NOVEMBER 2019

Dia 23 di november 2019, nan ta celebra 60 aña di existencia durante un reunion festivo, pa cual nan tin e grato placer pa invita bo. Esaki ta un oportunidad unico, pa bo bolbe bishita bo scol, paden y pafo, combersa cu ex-compañeronan di klas y disfruta di e presentacion musical. Nan ta en espera di bo presencia, pa duna bo un bonbini y un recorido na bo scol, unda bo a pasa hopi aña di bo hubentud. Carchi di entrada pa e reunion festivo ta costa AFl. 60,- y ta obtenibel na scol, na nan Oficina di Secretariado. (e-mail: info@colegioarubano.aw)

E NECESIDAD PA REPARACION GRANDI

Cu e recaudacion di e “Reunion Fundraising Event” aki, cu lo tuma luga na e “Reunion Plaza”, Colegio Arubano lo financia e reparacionnan necesario di e scol. Desde su fundacion na 1959, naturalmente a drecha hopi cos na e scol y na enseñansa. Nan ta purba bay cu tempo. Den e añanan venidero, nan kier sigui cu renobacion y mantenemento di e edificionan di scol, pero lastimamente e medionan financiero no ta alcansa. P’esey nan a acerca compania- y otro instancianan, pa nan duna nan apoyo financiero den e trabou grandi di reparacion di Colegio Arubano.

BO APORTE TA BONBINI!

Nan kier haci un apelacion na abo tambe, como ex-Colegiano, pa bo ayudo. Nan ta pidi bo pa haci un donacion na Colegio Arubano. Cada suma ta sumamente aprecia. Tur placa ta destina na reparacion, mehoracion y renobacion di nos scol. Nan ta spera cu bo duna nan bo sosten! Bo por deposita bo contribucion riba nan cuenta di banco na RBC Bank 31336649, Aruba Bank 16602269 of CMB 21078005, cu e nomber “Steun opknappen Colegio Arubano ex-Colegiaan”.