Sindicatonan a presiona gobierno pa reuni cu nan mañan pa indexering

ORANJESTAD – Sindicatonan SPA, TOPA, SADA, SIMAR y SEPPA ta topa gobierno diabierna awor pa loke por bira e ultimo intento pa logra haya pago pa indexering. Diahuebs mainta laat e sindicatonan a informa cu riba insistencia, gobierno a acomoda e sindicatonan pa reuni diabierna awor, envez di e intencion di dia 19 di November proximo. Si nada concreto sali di e reunion ey, e sindicatonan no ta descarta un accion grandi, pero esey tin cu keda concretisa durante un reunion cu tur miembro otro siman. 

SITUACION

Segun e vocero di e sindicatonan Eduard Maduro, gobierno inicialmente diaranson a invita nan pa un reunion pa otro siman 19 di November 2019, pa continua cu e deliberacion riba e proposicion nobo, pero sindicatonan a rechasa e fecha ey y a exigi algo mas liher. Como tal gobierno a dicidi pa acomoda e sindicatonan durante e reunion di conseho di minister di diabierna, pa atende cu nan e momento ey. Loke ta straña e sindicatonan ta cu gobierno e siman aki, contestando pregunta di prensa, a bisa caba cu den e presupuesto 2020, no tin placa reserva pa indexering. Esaki ta loke e minister di Finanzas Xiomara Maduro a bisa Noticiacla.com dialuna durante e conferencia di prensa unda cu gobierno a anuncia cu nan a keda cla cu presupuesto 2020 y cu lo e tin un surplus di 29 miyon florin. 

PROPOSICION ANTERIOR

Sindicatonan a repasa e ‘historia’ recien di indexering unda cu a mustra cu gobierno su proposicion ta desvia completamente di esun di sindicato, y como tal esaki a keda rechasa. Sindicatonan a opta e ora pa aun mas baha nan ‘demanda’ y wak si asina gobierno por ‘come accros’, pero ni asina gobierno no por a duna nada concreto. No ta conoci kico lo pasa diabierna durante e reunion y cu si esey por bira e ultimo reunion prome cu un posibel accion. Ta papiando pafo caba di un paro nacional, aunke cu e detayes no ta conoci.