MEP decepciona cu decision di Lejuez di bandona partido

SANTA CRUZ – Manera por a spera, partido MEP no a aprecia e paso cu (awor ex) parlamentario di MEP, Daphne Lejuez, a tuma door di retira, nada positivo. Durante un conferencia di prensa di e partido na cede na Santa Cruz, e presidente Hendrik Tevreden, lider di fraccion Rocco Tjon y lider di partido Evelyn Wever Croes no tabatin palabra positivo pa nan ex colega. “E ta un sla pa nos, e ta haci dolor” Wever a bisa den su declaracion, sigur pasobra e no a spera esaki di Lejuez. Di otro banda, segun Wever, esaki ta haci nan mas fuerte. 

NOTIFICACION

For di momento di e notificacion cu nan ‘no a haya’, te na e motibonan menciona di Lejuez pa a tuma su retiro di MEP y postula su mes como parlamentario independiente, tur tres orador a mustra nan desaprobacion total pa cu actuacion di Lejuez. E miembronan di partido MEP a mustra cu nan mester a tende via e medionan social di e decision di Lejuez, mientras cu lider di partido mes a haya e notificacion via Deurwaarder awe mainta. Segun Tjon, e ta refuta cu partido lo a pone presion riba cualkier parlamentario pa loke ta e.o. e ley di Serlimar. A uza como ehempel tratamento di jaarrekening di 2016 pa proba su punto. A cuestiona Lejuez riba su interes, unda cu a bisa cu interes comercial a vence riba interes general’, alegando cu Lejuez a scoge pa comercio, un cierto grupo y compania, enbes di pa pueblo.  A mustra tambe cu ta respeta e decision di Lejuez, pero cu no ta di acuerdo cu e motibonan y a sigui pa splica esaki tambe. 

MOTIBO REAL

Segun Tjon, e ta mustra cu e motibo real di Lejuez su retiro, lo a cuminsa siman pasa diabierna, ora cu den un reunion di comision central, Lejuez lo a distancia su mes di esunnan cu tabata pro, pa prohibi parlamentario Benny Sevinger di biaha pa Parlatino, debi cu e ta un sospechoso den un caso penal. Segun Tjon, Lejuez lo a bisa cu e si ta sostene Sevinger y cu e momento ey, el a retira di e forma di comunicacion di e coleganan di partido, esta di e chat group di Fraccion MEP. Ademas Tjon a enfatisa na final, cu tin indicacion cu e (Lejuez) lo ta asociando of a asocia cu otro partido. Wak e conferencia completo AKI via e pagina di Facebook di partido MEP. E potret ta un screenshot di e conferencia via Facebook.