Lejuez: Presion pa wanta coalicion hunto a surpasa interes general

ORANJESTAD – Presion pa wanta coalicion hunto a surpasa interes general. Y esey ta un cos cu parlamentario Daphne Lejuez no tabata dispuesto pa wanta. Pero ta e ley di Serlimar a bira e motibo final cu a pone cu parlamentario Daphne Lejuez a dicidi di bandona partido MEP y fraccion y declara su mes independiente. Manera e dicho ta bisa, ‘awa a pasa hariña’. Esaki pasobra tabatin otro cosnan cu den pasado recien tambe e tabatin problema cu ne manera e ley di BBO y otro cos. Asina Lejuez a bisa e.o. durante su conferencia di prensa extra ordinario den diaranson merdia den cual el a splica su motibo di retira di MEP y bira parlamentario independiente. Presion for di partido pa mantene e coalicion ‘na bida’ tabata parse mas importante cu interes general, y esey pa Lejuez no tabata aceptabel. A papia di presion y intimidacion eherce riba su persona, contal cu e coalicion keda hunto. Acusacion di ‘omkoperij’ tambe tabata un problema pa cual Lejuez a dicidi di tuma e decision cu e ta yama dificil, pa declara su mes independiente. 

SERLIMAR

Pa loke ta e ley di Serlimar, Lejuez a splica cu legalmente tin cosnan cu e ley cu no ta cuadra y cu dificilmente e por sostene. Entre nan, a splica cu segun su persona, no por tin un afvalstoffen heffing sin un afval stoffen verordening, esta un ley. Serlimar ta un compania Sui Generis y no por djis cuminsa cobra pueblo impuesto pa haya fondo. Sigur no sin tin un ley cu ta permitie haci tal. Y segun Lejuez, e ley aki no ta cumpli cu e puntonan aki. Y e presion riba su persona tabata grandi, pa e vota pro, y asina mantene e coalision hunto. Algo cu e no por a haci. Di otro banda, e interesante ta cu e ley no a pasa ainda, y como tal el a opta pa tuma un decisicion prome cu e ley keda trata finalmente y tin un voto. Actualmente e ley ta den 'freezer', y no a pasa. Y for di informacion cu e portal aki tin, ta mustra cu no tin intencion pa trata e ley aki ainda prome cu fin di 2019. 

INDEPENDIENTE

Segun Lejuez, e decision mas facil lo tabata pa entrega su asiento y bay sinta na cas cobra overbruggings toelage. Pero e kier haci locual el a drenta Parlamento pa haci, y esey ta defende interes di comunidad. Door di bira independiente, e no tin e presion mas di vota segun ‘partido’, pero segun su consenshi, cu ta algo cu e ta sinti cu e no por a haci mas siendo miembro di e fraccion. Ken specifico tabata pone presion, no ta conoci. 

HORTA ASIENTO

E parlamentario no ta considera malo loke el a haci, esta di keda cu e asiento, pasobra segun constitucion, e asiento no ta di partido, sino di e persona cu a huramenta pa e asiento. Di otro banda, e ta di acuerdo cu un persona cu mas voto, mester bira parlamentario, versus un hende cu tin menos. Den su caso, a tilde cu e tin apenas algo menos cu 200  (196) voto, y ta tuma decisionan asina. Lejuez a mustra cu e ta comparti e pensamento ey, pero e ora mester hacie completo. Esta den sentido cu e persona cu haya mas voto, mester keda den parlamento tambe y no bira minister, locual ta pasando awor. 

FUTURO

Pa awor, Lejuez ta bisa di lo keda den Parlamento, y defende loke ta husto. E hecho cu e ta independiente, no ta nifica cu e ta bira oposicion. Si tin leynan cu ta merece su voto, e lo vota pe, y esnan cu e no ta di acuerdo, e ta vota contra. E no tin pensa aworaki riba su futuro politico fuera di e dos añanan cu falta como Parlamentario. E no a dicidi esey ainda y awor su enfoke ta pa sigui traha pa locual el a huramenta pe. 

DESMENTI

Mientras cu Lejuez ta admiti cu su compania tin contract cu MetaCorp cu ta doño di EcoTech, ningun momento e compania ey a pone presion riba dje pa e vota contra e ley. Manera ta conoci, e compania a mustra cu si e ley en cuestion pasa, esaki lo por nifica cierre di varios compania di MetaCorp. Segun Lejuez, e contracto cu su compania tin (e la retira di e compania ora cu el a bira parlamentario y su casa ta sigui maneha esey) cu MetaCorp ta uno di 10 aña bieu y no ta cos di awor, y e suma cu e ta wordo paga, no ta algo grandi cu e lo tin cu dicidi pa vota contra of pro. Potret ta screenshot cortesia Telearuba. Lesa e discurso completo di Lejuez AKI.