Parlamentario Daphne Lejuez ta declara su mes independiente

ORANJESTAD – Parlamentario Daphne Lejuez ta declara su mes ‘independiente’. E motibonan official no ta conoci y lo keda divulga diaranson atardi pa medio di un conferencia di prensa. E unico cos cu el a laga sa ta cu e ta ‘elabora riba su decision recien di declara mi mes como parlamentario independiente di pais Aruba’. Asina e ta bisa den un invitacion na prensa pa e conferencia di prensa cu ta tuma lugar diaranson 3:30pm. Mientras cu ta specula riba motibonan, entre otro por pensa den direccion di inquietud cu partido MEP pa cu e ley di Serlimar y unda cu tabata pone hopi presion riba su persona pa e vota pro e ley. Recientemente el a bishita Gobernador y tin indicacion cu parti di su decision tabata relaciona cu e bishita ey, sea pa informa Gobernador of pa ‘indica’ kico ta sosodiendo. 

BANDONA MEP

Cu salida di Lejuez, MEP ta perde dos dama for di su fraccion den Parlamento den menos cu 6 luna di tempo. E diferencia ta cu Lejuez no ta forma parti di MEP mas, mientras cu e otro persona cu a retira, Sue Ann Ras, si a keda cu e partido, pero solamente a retira como Parlamentario. Cu esaki, MEP ta bira un partido cu 8 asiento, AVP 9, POR 2 y RED 1. Keda pendiente pa mas informacion.