Señora Carnaval 2019 a keda deteni diamars pa estafa

ORANJESTAD – E persona cu tabata den noticia e weekend aki pa motibo di lo a bende carchi pa concierto, pero no a entrega e carchi, esta Clarissa A, a keda deteni diamars, segun confirmacion cu noticiacla.com tin. E persona encuestion cu ta cargando e corona di Señora Carnaval 2019,  ta deteni riba sospecho di estafa, esta oplichting. Esaki despues cu personanan cu a cumpra carchi di concierto cerca dje, no a haya loke nan a paga p’e, a entrega keho na recherché dialuna. A base di esey, polis a actua y a detene A. diamars atardi. 

E CASO 

Tabata den fin di siman cu e informarcion a cuminsa circula cu A lo tin problema pa ‘produci’ e placa cu e lo a haya di hende cu a cumpra carchi pa concierto di Marco Antonio Solis. Ora cu e fecha tabata yegando, hendenan a cuminsa bira nervioso pa motibo cu nan a paga e persona aki basta placa, pero ainda no a haya nan carchi. E persona aki a duna esnan afecta yen di motibo, segun promotor di e concierto Steve Hudson a splica noticiacla.com dialuna, cu ta varia di cu nan a atraca A, cu el a perde contacto cu e persona cu lo mester a warda e placa, te na e hecho cu belasting a pone beslag riba su cuenta. Ora cu hendenan no a haya nan carchi di A, nan a acudi na e oficina mes di e promotor, pero aki nan a dal den bashi pasobra e promotor a mustra cu tanten cu e no haya e placa, ningun hende no ta haya carchi. Y mirando cu e concierto a tuma lugar sin cu e grupo di persona aki a haya nan carchi, dialuna a dicidi di acudi na recherché pa entrega keho di estafa contra e persona. 

SEÑORA CARNAVAL

E persona aki, esta Clarissa A, a keda eligi e aña aki como Señora Carnaval, pues ta un figura publico awor y hopi conoci den comunidad. Ora cu e suseso a bira conoci, e fundacion di carnaval SMAC mesora a saca un comunicado informando cu nan ta distancia di e caso, pendiente kico sali afo. Awor e fundacion tin cu determina kico nan ta bay haci, segun e caso sigui su curso. Pa aworaki, e caso ta uno legal segun e presidente Jason Brown, y lo tin cu warda e proceso cana su caminda. NOTA DI REDACCION: Manera ta regla semper di e portal aki, ora cu ta detene personanan den comunidad,  ta usa e regla cu ta tapa cara di e persona, pa medio di un balki preto. Esaki ta valido mientras cu e persona ta deteni, pero no sentencia. Unabez cu esey cambia, y unda cu p.e. e persona keda sentencia pa un huez, ta cambia e situacion. Pesey semper a tapa cara di personanan cu cay cera den comunidad. E regla ta cambia ora cu ta trata di figuranan publico, manera politico, artista, y of den e caso aki, personanan cu ta carga titulo publico manera p.e. Sra Carnaval.