Tweede Kamer ta trata structura nobo pa islanan hulandes den Caribe

DEN HAAG – Awe Tweede Kamer ta papia di un posibel structura nobo pa ‘Antias’. Esey ta sosode sin minister Ronald Plasterk di Relacionan di Reino. Fraccionnan ta delibera prome riba e nota di inicio di partidonan VVD y SP, dos fraccion na dos extremo pero cu a haya otro riba e punto di bista di e region caribense hulandes. Asina e website di noticia Persbureau Curacao ta raporta dialuna.

Pa e liberal y socialistanan e asunto ta hopi cla: Corsou, St Maarten y Aruba mester scohe. Of e relacion cu Hulanda ta bira mas igual den un relacion di cooperacion nobo, of nan ta sigui e reglanan manera estableci den statuut di Reino Hulandes.

E ultimo ta nifica cu e islanan mester atende nan problemanan di financia y corupcion cu man duro, y no resisti contra e metemento di Hulanda. Hulanda, segun statuut, ta esun finalmente responsabel, pues como tal mester interveni, segun miembro di Tweede Kamer di VVD Adré Bosman. Si esey no tuma lugar, mester bin un tipo di mancomunidad. Cada isla ta bira independiente, cu colaboracion como punto di salida. Tweede Kamer sinembargo, ta dividi riba esaki.