Carnival Cruise Lines ta inclui Aruba den celebracion di 25 aña crucero for di Tampa

TAMPA – Carnival Cruise Lines a hinca Aruba den su itinerario pa celebra 25 aña cu e ta haci crucero for di Tampa, Florida. Asina e compania a anuncia e siman aki. E compania a bin ta celebra e hecho aki, y awor a bay un poco mas leu. Loke esaki ta nifica ta cu a añadi un crucero di 13 dia cu ta Tampa pa New York, cu ta inclui Aruba den su itinerario. Ta prome biaha cu e bapor specifico aki, esta Carnival Legend lo ta na Aruba. Otro bapornan di Carnival ta custumbra di bishita Aruba semanalmente, pero Legend no tabata programa. 

E ITINERARIO

E itinerario di e crucero special aki, ta inclui transito parcial di Panama Canal, Aruba, Cozumel, Costa Rica, Colombia y Grand Turk. E ta programa pa yega Aruba dia 11 di mei 2020 pa 9’or di mainta y bandona nos isla 10’or di anochi. E bapor ta carta  2681 pasahero. E portal aki a compronde cu esaki ta un di e dos cruceronan extra cu e compania a anuncia den cuadro di e celeberacion aki.  

CELEBRACION

Recientemente e compania a celebra 25 aña saliendo for di e waf di Tampa. Pa celebra esaki, a tene un evento grandi riba e bapor crucero Legend, unda cu a presenta placaat. E prome crucero for di Tampa tabata na 1994, y tabata transporta den careda di 28 mil pasahero pa aña for di e waf aki. Awe, e compania ta opera dos bapor for di Tampa transportando 240 mil pasahero pa aña.