Minister ta desmenti cu no a contesta tur pregunta riba ley di Serlimar

ORANJESTAD – Desmintiendo rumornan, no ta asina cu e ley di Serlimar mester pasa prome cu e retira dia 12 di December 2019, y si e ley no pasa, Serlimar no ta cera y no ta bay kita ningun hende for di trabou. E mandatario a descarta e comentarionan ey como absurdo, na www.noticiacla.com dialuna mainta durante un conferencia di gobierno. E minister no por a confirma e otro alegacion, esta cu dos parlamentario ‘tin e ley secuestra’, esta cu nan no ta cla pa vota pro. 

LEY SECUESTRA

E mandatario ‘no sa’ si tin dos parlamentario cu tin e ley di Serlimar ‘secuestra’. Reunion a keda geschorst. Contrario na un parlamentario di MEP (Daphne Lejuez), cu recientemente ainda a bisa cu ainda tin preguntanan cu e tin cu no a haya contesta, Oduber ta sigura cu el a contesta tur pregunta. “Di parti di gobierno, tur pregunta cu a wordo haci, a wordo contesta, sin excepcion”. Segun Oduber enberdad Lejuez tabata un di e parlamentarionan cu basta pregunta den e prome tanda, cu no a wordo contesta por escrito, pero den prome tanda a pasa riba tur e preguntanan aki un pa un. “No tin ningun pregunta cu ta sin contesta na Parlamento” Oduber a bisa.  Lejuez sinembargo riba su pagina di Facebook a mustra cu ainda e tin inquietud, esta cu tin pregunta ainda cu no a haya contesta. No ta conoci si e lo haci esaki unabez cu e reunion continua y cu si e haya e contesta satisfactorio, cu esaki lo nifica cu e por ta confortable pa vota pro.