Presupuesto 2020 tin surplus pero no lo por aprob'e prome cu deadline

ORANJESTAD – Mientras cu gobierno a anuncia dialuna cu a logra hinca presupuesto 2020 den otro y cu un surplus, e pregunta ta si e lo keda aproba na tempo pa evita un aanwijzing for di Hulanda. Minister president Evelyn Wever a anuncia cu e presupuesto ta cla y cu un surplus di 29 miyon florin. Di otro banda, contestando pregunta di www.noticiacla.com, minister Xiomara Maduro a bisa cu no ta kere cu e lo ta aproba prome cu 15 di December 2019, cu pa ley di LAFt, ta e fecha cu mas tarda e presupuesto mester ta aproba y ratifica pa gobernador, y entrega na CAFt. 

E PRESUPUESTO

E presupuesto mester a keda cla pa entrega na Parlamento pa 1 di September ultimo, pero esey no a logra. Esaki mientrastanto ta cla, pero awor tin cu cuminsa cana su caminda pa e por keda finalmente aproba pa Parlamento y ratifica pa Gobernador. Wever a bisa mientrastanto cu ta un logro cu e presupuesto 2020 tin un surplus di 0.5%. Segun Wever, na aña 2008, 2003 y 1993 tawatin surplus. Cu esaki, ta di 4 biaha cu nos presupuesto tin un surplus desde cu nos ta pais pero e diferencia ta cu esaki ta basa riba un strategia y maneho financiero structural. Esaki, Prome Minister a enfatisa, ta suppose di keda asina tambe. Surplus den nos presuepuestonan pa futuro mester keda structura. Esaki lo pasa contal cu tin un gobierno responsabel. Gabinete Wever-Croes a tuma desicionnan pa pone e pais den e rumbo financieramente stabiel pa e keda asina tambe pa nos futuro generacionnan. 

LAAT

“Muy probablemente pa 15 di December nos no ta bay tin un presupuesto cu ta cla, cu ta ratifica cu tur eseynan, pero si bo ta bay tin como CAft, un bista riba un presupuesto cu ta un presupuesto cu ta wordo traha den tur seriedad” Maduro a bisa. Y esaki ta e punto cardinal segun Maduro, esta e parti di ‘un bista’. Esaki pasobra e ley ta bisa cu si tin un bista di kico e presupuesto ta, tambe ta ok, segun interpretacion di gobierno di Aruba. Noticiacla.com a puntra CAFt recientemente si nan tin tolerancia pa un entrega ‘laat’ di gobierno pero nan a mustra cu nan kier e presupuesto na tempo. Segun CAft nan no ta mira pakico e mester ta laat. Di otro banda nan a mustra si cu a tuma nota cu e presupuesto no a keda entrega na parlamento dia 1 di September 2019. “Aparentemente nan tabatin mester di mas tempo” presidente di CAFt a bisa e tempo ey. Pero no a mustra cu nan tin mucho tolerancia pa entrega laat. Lo mira ora cu e tempo yega, kico nan pensamento ta riba e parti ey.