Companianan di tours y huurmento di ATV y UTV a forma asociacion

ORANJESTAD - Compania di tours y huurmento di ATV y UTV recreacional a forma asociacion. Asina un comunicado di E grupo a informa dialuna atardi. Segun e comunicado, e no ta nada desconoci cu ultimo tempo e actividadnan recreacional di ATV/UTV a wordo poni bou di un luz negativo, pa cual 12 compania na Aruba cu ta dedica na tours y huurmento di esakinan a bini hunto na luna di juni 2019 cu e intencion di forma un asociacion di operadornan di ATV/UTV cu e meta pa organisa e sector importante aki di atraccion turistico.  E asociacion a bin cu un motto: Brinda un atraccion sostenibel door di cumpli cu e rekisitonan legal y tecnico como tambe un politica di conduci responsabel.

METANAN

E asociacion tin diferente metanan. Entre otro atende cu e preocupacion di e comunidad local y bini hunto como un solo curpa cu ta opera bou di 'Politica di maneho responsabel y sigur' pa asina sigura un actividad recreacional sostenibel. Tambe e ta hopi importante pa por ta un parti activo di futuro regulacionan/legislacionan cu ta concerni vehiculonan ATV/UTV. Otro meta importante ta e uzo di e tecnologia GPS pa mehora e calidad di servicio y control den termino di velocidad y ubicacion pa preveni incidentenan y pa proteha areanan restringi. Y sigur algo cu no por keda afo ta e meta di establece rekisitonan legal y tecnico pa por ta eligibel pa bira miembro di e asociacion ATV/UTV.

VARIOS REUNION

Segun e comunicado, ta hopi importante pa remarca cu ya caba e grupo di companianan a reuni cu varios miembro di e comunidad entre otro cu Parke Arikok y a presenta varios sugerencia pa elimina completamente e trafico di motor den diferente areanan di parke Arikok por ehempel "Conchi" cu e intencion di reduci e impacto riba naruralesa, den un forma igual pa tur compania di tours pa por mantene un competencia husto. Tambe a reuni cu un grupo di bisiñanan afecta pa e actividadnan aki y e board por a haya e compromiso di varios compania pa cambia e rutanan pa reduci e impacto serca e bisiñanan aki.

REUNION CU MINISTER

Durante e ultimo lunanan e board di e grupo ATV/UTV a pidi un reunion cu Ministernan di Husticia, Transporte y Infrastructura por medio di un carta cu e obhetivo pa atende cu e desafionan actual di e sector importante aki di e industria turistico y pa explora maneranan pa reduci e impacto cu esaki ta causando den comunidad y e medio ambiente. Pa cu esaki e board ta urgi e ministerionan pa meimei di nan agenda druk pa saca tempo pa atende nan carta mas pronto cu ta posibel pa por soluciona e situacion aki.

REPRESENTACION

Di tal manera e asociacion di operadornan ATV/UTV ta representa 12 compania comprometi pa opera tours recreacional sostenibel, cumpliendo cu e rekisitonan legal y tecnico y pa pone como un standard e bon practica pa maneho responsabel y sigur.