Persona indocumenta cu a huy di GNC, ta sigui fugitivo

ORANJESTAD – E persona Venezolano indocumenta cu a huy diaranson anochi for di Guarda Nos Costa (GNC), ainda ta fugitivo.E director di e departamento Trudy Hassell a confirma esey pa noticiacla.com diahuebs mainta.  Ta trata di Gregorio Fernandez Rojas (37), cu a yega Aruba e aña aki di forma ilegal via boto for di Venezuela  Tabata diahuebs anochi cu e persona a logra huy, causando un problema pa e.o. aeropuerto. Esaki pasobra e localidad di GNC ta pega na aeropuerto su tereno. Aeropuerto haye ta cera pista pa evita cu e persona lo por a yega ey riba y causa problema cu eventual buelo (nan). Despues di mei ora a opta pa habri e pista bek, aunke e persona tabata fugitivo ainda. 

AEROPUERTO

Tabata mas of menos 10 pasa di 7 di anochi cu aeropeurto a informa cu a cera pista, pa un ilegal ‘potencial’ cu a logra huy di e facilidad di GNC, y subi tereno di aeropuerto. “Nos ta buscando riba e tereno hunto cu polis. Asina cu e area ta liber, nos lo habri e pista bek” tabata e mensahe di e vocero Hendrik Croes. Mes momento a informa cu e buelo pendiente pa lanta, esta KLM tabata pendiente. Pa mas of menos cuarto pa 8, aeropuerto a informa cu a opta pa habri e pista, pa no ‘delay’ e buelo mas di KLM, aunke cu no a bisa si a logra gara e persona of no. Awe mainta a resulta cu no a logra pone man riba e persona ainda. 

PROBLEMA

No ta prome biaha cu tin problema na GNC, cu esnan cu ta deteni eyden pendiente nan deportacion pa nan respectivo pais. Y tempo tempo tin lantamento eyden di esnan cu no ta contento, cu ta pone cu polis mester bin reforsa esnan cu ta cuida e lugar y esnan ‘deteni’. Diahuebs tabata un di e dianan ey atrobe, aunke e biaha aki un persona a logra huy, y cu ainda ta fugitivo.