ORANJESTAD - Banco Central di Aruba (BCA) ta anuncia cu durante di e periodo di 8 te cu 29 di november 2019, BCA lo tene bao di nos comunidad e secundo “Encuesta di Corupcion”. E meta ta adkiri informacion valioso tocante e experiencia y percepcion di nos ciudadanonan pa cu e nivel di corupcion. Door cu Aruba no ta forma parti di e encuestanan internacional riba e topico di corupcion, BCA a dicidi di tene e “Encuesta di Corupcion” pa prome biaha na 2018. E encuesta aki ta pa un gran parti basa riba e metodologia y preguntanan aplica door di ‘Transparency International’ y tambe tin algun pregunta relata na Aruba su propio situacion. E encuesta ta inclui, entre otro, preguntanan relata na e nivel di corupcion, experiencia cu corupcion na momento di haci uzo di entre otro servicionan particularmente den e sector publico, experiencia ora di raporta corupcion, y e necesidad pa medidanan adicional pa combati corupcion.
Pa yuda BCA colecta e datonan aki un grupo di encuestador lo bishita diferente cas y haci e entrevistanan den nomber di BCA. E encuestadornan lo identifica nan mes cu un carnet cu e logo di BCA. Encuestadornan tin e obligacion pa tene tur informacion cu nan ricibi estrictamente confidencial. BCA ta consciente cu e informacion aki ta sensitivo y ta enfatisa cu e encuesta ta totalmente anonimo y ta garantisa cu lo trata tur informacion obteni confidencial y lo uze solamente riba un base agrega pa metanan estadistico y analitico. BCA ta conta cu tur persona cu wordo aserca door di un encuestador lo participa den e encuesta y lo duna nan maximo cooperacion.
Si tin cualkier pregunta riba e topico aki, por tuma contacto libremente cu sra. Ghislaine Paalman, Statistics Department na BCA, na tel. 5252100 of via e-mail: [email protected] .
ORANJESTAD - Den e prome kwartaal di 2024, por spera cifranan prometedor y solido pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA ta raporta diahuebs. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’.
ORANJESTAD – Diahuebs 14 di maart, Minister di Turismo y Salud Publico Sr. Dangui Oduber a ricibi un invitacion pa bishita Aruba Boutique and Art Hotel cu lo habri nan porta dia 1 di April 2024. Un boutique hotel nobo den curason di Palm Beach cu lo forma parti como miembro di e marca Best Western Signature Collection.
ORANJESTAD – Diaranson mainta 27 di maart Prome Minister Evelyn Wever-Croes hunto cu colega Minister di Finansa Xiomara Maduro a biaha pa Corsou pa reunionan importante den cuadro di e tema di ENNIA.
MIAMI – E compania hotelero Four Seasons awor tambe ta sigui e trend di e compania Ritz-Carlton cu a inicia cu nan coleccion di yate luhoso estilo crucero. E compania a anuncia cu nan tambe ta drenta den e negoshi ey, di ‘espacio di crucero luhoso ultra chikito, cu su prome yate den construccion na Italia. E prome destinacionan ta conoci y ta pa Caribe, cuminsando na 2026. E temporada Caribense lo core di januari pa maart 2026 cu parada na St Barth, Nevis, the Grenadines, Saint Lucia, Barbados, Martinique, Curacao, Aruba y Guadeloupe. Cada bapor lo tin solamente 95 suites, cu ta 50% mas espacio pa persona cu cualkier otro crucero. Cada camber lo tin bentanan gigante di vloer te plafond, hopi vanidad den e bañonan y terras priva. Asina e presidente y CEO di Four Seasons Alejandro Reyna a sigura.
ORANJESTAD – CEO di Aruba Hotel & Tourism Association Tisa LaSorte, recientemente durante e programa Noticiacla LIVE a pidi pa hende na Aruba no bay protesta contra turista na Aruba riba e desaroyo di turismo. Den e video, e ta splica e peticion mas amplio.