Oduber: Grupo encarga pa embeyecimento riba Watty Vos Boulevard

ORANJESTAD - A forma un grupo cu ta encarga pa creacion di diferente concepto di embeyecimento cu lo aplica riba e rutanan pa introduci caracteristicanan unico tur rond di e avenida (Watty Vos Boulevard). Asina minister di infrastructura Otmar Oduber ta bisa riba su pagina di facebook diaranson. For di diamars mainta e avenida a habri, pero e no ta completamente cla ainda. Loke no ta mucho cla, ta pakico awor ta traha e grupo, mientras cu tin pinturanan caba cu ta ilustra con e producto final lo keda. 

ELOGIO Y KEHO

Asina cu e avenida a habri, tanto elogio como keho a cuminsa drenta riba social media. Elogio tabata hopi, pa e facilidad cu uno por yega di un punta pa e otro punta, e buniteza di e paisahe cu diripiente ta bira conoci cu habrimento di e avenida, y e facilidad cu e caminda ta ofrece. Di otro banda, a cuminsa keha riba e falta di borchi cu tabatin riba e avenida, indicando unda tur e areanan ta y con pa yega na cierto area. Diripiente varios area a bira conoci cu antes no tabata trafica di e forma ey. Pues a cuminsa cuestiona pakico no tin borchi cu ta indica unda cua rotonde ta hiba un persona. Ademas, a critica e parti di santo mei mei cu ta separa e doble vianan riba e avenida. Mescos cu tabata e caso riba Green Corridor, a usa e mesun forma di separacion, esta cu cero di santo. BORCHI VS REALIDAD

Otro situacion cu a bin ta e hecho cu ora cu a traha e presentacion cu pintura y mapa, e potretnan riba presentacion tabata duna un indicacion mas moderno, futuristico, pero e realidad ta leu di esey. Sigur pa loke ta e overpass, of e viaductnan. Riba e potretnan inicial ta mustra consnan totalmente diferente compara cu esun cu awor a keda cla, mustrando como si fuera ta saco di cement a stiwa riba otro y verfnan.

AKI CUATER LUNA

Segun e mandatario, e trabou completo no ta cla ainda y ora cu esaki keda cla, aki 4 luna, por mira un cambio mas miho di con e producto final lo keda. No a bisa si, si esey ta conta pa e viaductonan tambe, of si esey ta keda manera cu e ta, ni cu si tur e potretnan cu a keda comparti tur e añanan durante construccion, lo bira e producto final tambe. Segun Oduber su post riba facebook, ‘e meta ta pa crea un aspecto local di locual Aruba ta representa a traves di diferente mata entre otro, considerando cu e ta un avenida central. Permitiendo pa tur cu ta trafica e caminda (incluyendo turista) pa cera conoci cu Aruba a traves di e diferente puntonan di conexion’. Te aki su post riba facebook. Aki 4 luna lo mira kico ta e producto final. Mientrastanto trafico ta move riba e avenida nobo y ta cuestion di tempo pa wak  con esaki lo desaroya.