Update: Alarma di posibel secuestro di avion na Schiphol tabata falso

SCHIPHOL – E melding di un secuestro di un avion na Schiphol mas tempran, a resulta di ta alarma falso. Segun e aeroliña Air Europa, a activa e alarma pa ekibocacion. “Nada no a pasa” e compania a bisa riba twitter. Loke a pasa ta cu e capitan tabata splica kico tur e codigonan tabata kier men y pa ekibocacion a manda e codigo ey. No ta cu tin un conopi cu ta primi cu ta activa e alarma, sino un mensahe verbal. Ora cu e alarma a wordo bati, a mobilisa henter un arsenal di autoridad mesora cu a paralisa parti di e aeropuerto diaranson anochi, ora di Hulanda.