CAFt: Corespondencia manda pa cu aanwijzing a bay conforme ley

ORANJESTAD – E corespondencia manda pa cu conseho pa  aanwijzing pa Aruba a bay conforme ley. Asina mester compronde di e presidente di e colegio di supervision financiero CAFt, Raymond Gradus. Gobierno (lesa: minister Xiomara Maduro) na september a cuestiona e forma con CAFt a manda dos carta riba e conseho pa aanwijzing, y e contenido di e carta. Gradus ta sigura e portal cu nan a actua conforme e ley di LAFt, y cu ademas gobierno durante ultimo bishita di e colegio, no a reclama riba e asunto aki. Pesey Gradus no ta compronde e pregunta pesey haci pa noticiacla.com, pasobra durante su bishita na Aruba, gobierno no a haci ningun remarke riba e tema.

E KEHO

Tabata fin di September ultimo cu gobierno a informa prensa cu nan no tabata na altura cu CAFt a manda dos carta, riba e asunto di ‘aanwijzing’. Por lo menos, asina Minister di Finanza, Xiomara Maduro, pa clarifica pa noticiacla.com e tempo ey durante un conferencia di prensa. E hecho cu tabatin dos carta, a crea un confusion necesario den comunidad, cu a bay asina leu cu cierto persona tabata yama Prome Minister Wever pa gañado. Esaki pasobra Wever a cita parti di un carta di CAFt na prensa, cu no a keda publica, creando e impresion, cu e lo a cita un carta robes. Esaki a sosode, pasobra e otro carta publica riba e mesun tema, tabata poco diferente den e contenido.

CONFUSION

E pregunta exacto na e mandatario na september tabata, pakico gobierno no a informa for di un comienso cu tabatin dos carta, pa asina evita tur e confusion. Pero eynan a bin compronde di Maduro, cu gobierno mes no tabata na altura cu tabatin dos carta. E ta algo cu ta un ‘novum’ segun Maduro, pasobra esaki no a sosode anteriormente. De hecho, segun Maduro, CAFt no a actua corecto, pasobra CAFt mester a djis manda un carta di anuncio na Parlamento, cu CAFt ta sugeri pa RMR pa bin cu un instruccion (aanwijzing) pa Aruba. Sinembargo, CAFt a opta pa skirbi un carta completo cu splicacion, pero no mencionando ‘e berdad completo’. Como tal, segun Maduro, CAFt a conta e ‘mitar berdad’, creando tur e confusion aki y creando asina division den pueblo.  

REACCION CAFT

“Den ley ta para loke cu nos a haci” Gradus a cuminsa na bisa riba e pregunta di nan ‘dos cartanan’. A mustra cu durante nan bishita na Aruba, nan a combersa den bon forma cu gobierno. Y ningun momento a bin un reclamo di parti di gobierno riba e aspecto ey. “Pesey mi no ta reconoce loke bo ta bisando”, Gradus a bisa. Ora cu e portal a mustra riba e hecho cu a manda dos carta envez di un, di cual a opta (e biaha aki) pa envez di djis ‘informa’ parlamento di e conseho pa aanwijzing, pa skibi un carta completo, Gradus a bisa cu e topico ey no a bin na discussion. “Mi ta supone cu e caso a keda soluciona” Gradus a bisa. Ora cu a puntra Gradus, pakico a haci e cambio, e no kier a contesta y a bolbe ripiti cu e asunto no a bin na discussion. Esaki ta nifica cu sea gobierno a opta pa no trata esaki mas enberdad, of cu CAFt no ta comodo pa contesta e pregunta ey.