Alumnonan EPB San Nicolas a haci tour di orientacion hotelero

ORANJESTAD - Alumnonan EPB San Nicolas a haci tour di orientacion hotelero recientemente. Ta trata di e di tres ‘Property Orientation Tour’ pa e alumnonan di Unit Startjaar di EPB San Nicolas. Durante di e tour aki e alumnonan a haya e oportunidad di sera conoci mas di serca cu diferente departamento den un di e 11 resort cu nan a bishita. 

Nan a bishita Playa Linda Beach Resort, Aruba Marriott Resort & Stellaris Casino, Caribbean Palm Village Resort, Casa del Mar Beach Resort, Costa Linda Beach Resort, Divi Divi Resorts, La Cabana Beach Resort & Casino, Paradise Beach Villas, Amsterdam Manor Beach Resort Aruba, Eagle Aruba Beach Resort & Casino y La Quinta Resort. 

Durante di e tour aki e alumnonan a haya un  orientacion riba kico e trabounan den e diferente departamentonan ta ensera, kico ta e exigencianan, e actitud y e preparacion necesario cu nan mester tin pa por labora den un di departamentonan aki. Nan a bishita e departamento di Maintenance, Food and Beverage, Front Desk, Housekeeping, Administration, Security y Sales. E alumnonan aki a haya un treat na e resortnan y un super bon trato di e departamento di Human Resources, segun e comunicado di EPB. EPB San Nicolas ta sumamente agradecido pa cu e iniciativa di ATSA, ‘Aruba Timeshare Association’ pa brinda e alumnonan e oportunidad di experimenta un dia den mundo hotelero di Aruba y alabes motiva e alumnonan pa cuminsa un carera den e sector di turismo di Aruba.