Gobierno a haya un siman pa acepta proposicion nobo di sindicatonan

ORANJESTAD – Durante un reunion cu a dura hopi cortico segun sindicatonan bringando pa indexering, nan a entrega un proposicion nobo na gobierno y a duna gobierno un siman pa reacciona positivamente riba dje. Den e proposicion nobo, sindicatonan a baha nan punto di salida inicial di 3.6% te na 2.4%, cu ta ekivalente na 101 florin extra pa luna. E 1.2% cu falta, gobierno por paga den forma alternativa, y esaki por wordo dicidi den e commission cu sindicatonan kier pa gobierno instala rapidamente. 

RECHASO

Den e carta cu nan a manda ( y cu ta den poder di noticiacla.com) e sindicato ta confirma cu nan ta rechasa e proposicion inicial y ta bisa cu nan punto di salida ta cu gran parti di e indexering mester wordo paga den salario. “Nos miembronan tin un buraco caba den pensioen cu nan no kier pa bira mas grandi”. E oferta anterior di gobierno cu ta cuminsa paga indexering den un cierto forma pero te na 2025 simplemente no tabata aceptabel. Awor gobierno tin te diamars 12 di November pa 12’or di merdia, pa tuma un decision final. Lesa e carta di sindicatonan AKI.