Sindicatonan ta topa gobierno awe atrobe pa indexering

ORANJESTAD – E grupo di sindicato SEPPA, SPA, SIMAR, SADA y TOPA cu ta purbando pa haya pago di indexering for di gobierno, lo topa gobierno pa di dos biaha diamars mainta pa ricibi un di ‘dos’ propuesta di parti di gobierno. Esaki despues cu e prome proposicion di gobierno a keda unanimamente rechasa pa e sindicatonan en cuestion. E pensamento di sindicatonan ta pa awe diamars mainta haya un proposicion cu ta realistico, sino sindicatonan ta determina pa tuma accion den nomber di nan miembronan. 

E PROME  OFERTA

E prome oferta ofreci pa gobierno a papia di un aumento di 0.6% di e voorjaars, najaars y reparatie premie. Hunto esaki ta acumula na 303 florin pa aña pa cada trahado. Ambtenaarnan lo haya liber riba nan cumpleaños. Si nan dia liber cay riba un dia liber caba, e siguiente dia ta bira liber pa nan. Pero pa enseñansa esaki ta bira mas dificil, pues esaki ta cambia pa un dia di enseñansa cu ta acompla na e hersftvacantie. Acerca, gobierno kier purba un areglo pa pensioen delanta pa trabounan extra duro. Tambe un flexibilisacion di acuerdonan di trabou unda cu un part time por bira un opcion. 

REACCION

E prome reaccion di e sindicatonan no tabata mucho entusiasma. “E no tabata mucho denderend’ e lider sindical di SIMAR, Josephine Albertus a bisa e portal aki ora cu nan a ricibie. Anochi nan a reuni den nan seno y a rechasa e oferta formalmente. Otroo sindicatonan tambe a rechasa e oferta.  

OTRO CHENS

E grupo di sindicato despues a duna gobierno te diabierna siman pasa pa presenta un propuesta nobo, uno ‘realistico’ pa cu pago di indexering. Asina e sindicatonan a manda bisa gobierno diamars siman pasa den un carta cu ta den poder di noticiacla.com. E sindicatonan ta haci mencion di tres punto. E prome ta unda cu nan ta ‘rechasa e prome oferta categoricamente’, mientras cu e di dos ta cu nan punto di salida ta keda 3.6% y cu nan kier algo ‘realistico’, y finalmente, e proposicion mester tabata cla pa diabierna pa nan por cuminsa negosha diabierna mes. Pero esaki no a keda cla y sindicatonan a haya un cita nobo pa awe diamars mainta 11’or.