Control di polis cu 19 aresto den operacion special den Oranjestad

ORANJESTAD - Control di polis a conduci na 19 aresto den operacion special den Oranjestad . E ultimo dos simannan cu a transcuri, polisnan a tene varios control preventivo den areanan di risico halto den e districto di Oranjestad. E resultado tabata fructifero si analisa cuanto detencion tabatin, arma confisca y ilegalnan deteni. Specificamente tabata trata aki di accionnan di "preventief fouilleren" pa arma di candela. Manera ta stipula den ley, e accionnan aki ta wordo dicidi hunto cu Ministerio Publico, nan ta wordo a aproba pa e institucion aki y ta wordo anuncia di antemano na nos comunidad. E resultadonan di e prome siman tabata positivo y di dos siman a haya aprobacion atrobe pa efectua un accion, e biaha aki na Corazon Espinado y becindario y den cayanan di Oranjestad y Dakota.

Un control basta intenso a tuma luga for di 6or di atardi riba diabierna te cu diasabra 6or di mainta bao encargo di Sub Inspector Johnny Henriquez. Un team di 50 Polis a participa na e accion exitoso aki. A inclui e departamentonan di Droga, TBP, K-9, Motor Unit, Warda Nos Costa, Cuerpo Especial Arubano, Mobiele Eenheid y Centrale Post, como tambe Polisnan uniforma di e seccion di patruya di Oranjestad den e accion aki.

Den un forma mas strategico, a controla cierto cayanan, restaurant y clubnan nocturno, a base di e poder adicional adkiri dor di Ministerio Publico. E control a produci na final un total di 6 detencion pa posesion di droga y of arma blanco. A detene un sospechoso pa insulta Polis den cuadro di ehecucion di su funcion. E sospechoso a haya un multa di Afl. 1550,=. A detene 3 persona pa buracheria y mal comportacion. Atrobe e departamento di Warda nos Costa a logra detene 7 persona cu no por a prueba nan estadia legal riba nos isla. A detene 2 sospechoso tambe cu arma di candela den nan poder y varios articulo, manera joyas, laptop, etc, cu probablemente ta procedente di ladronicia. E exito di siman pasa a pone cu Ministerio Publico a bay di acuerdo pa aplica e maneho di “faya pa bo haya” (lik op stuk beleid) unda por paga un boet al instante y sali liber mesora. Polis a cobra un suma di algo mas di 4 mil florin djis riba e anochi di control aki.