Kwartiermaker ta contradeci Caribisch Netwerk riba reunion entre Rey y ombudsmannan

DEN HAAG/ORANJESTAD – E articulo riba e encuentro recien na Hulanda entre Rey Willem Alexander y e ombudsmannen di Corsou,a reacciona via gobierno St Maarten y Hulanda y e kwartiermaker Sahaira Kelly di Aruba no ta duna un bista corecto di e reunion. Por lo menos segun un di e personanan cu tabata den e reunion, esta e kwartiermaker pa Aruba, Kelly. E portal Caribisch Netwerk (CN) a raporta diadomingo cu Aruba a mustra berguensa na e Rey pasobra ainda Aruba no tin su ombudsman y cu e desapunto tabata bisto riba cara di Rey. Dialuna, sinembargo, e kwartiermaker, a reacciona via gobierno cu ningun momento so esaki tabata e caso. E articulo di CN ta sigui cita Kelly specificamente, pero riba e citadonan Kelly no ta reacciona. No ta conoci si esaki ta un tipo di ‘damage control’ cu Kelly mester a haci riba peticion di gobierno. 

E ARTICULO

E articulo di CN a keda publica dia 3 di November, cu ta pinta un bista ‘negativo’ pa Aruba pa e hecho cu ainda nos no tin un ombudsman segun Kelly. E articulo, di John Samson, ta raporta riba e encuentro cu Rey, y ta haci mencion cu e.o. Aruba ta lobby ya 15 aña fuertemente, sin exito (pa haya e ombudsman) pa motibonan politico. “Honestamente, mi ta hay’e bergonsoso cu Aruba no tin un ombudsman” e articulo di CN ta cita Kelly. “Mi no a haye bon cu mi mester a conta e Rey e storia aki” Kelly ta sigui bisa den e articulo di CN. CN ta raporta tambe cu por ‘a wak berguensa’ riba cara di Kelly. Kelly ta refuta esaki den un reaccion cu a wordo suministra via gobierno, unda cu segun e articulo “ Señora Kelly a indica cu na ningun momento Aruba a mustra berguensa, al contrario Aruba ta hopi agradeci cu anualmente ta ricibi invitacion pa participa na e reunionnan di e Ombudsmannan den Reino”. Kelly mes ta wordo cita bisando cu “Ta un lastima cu e desaroyonan positivo no a wordo subraya”. Aki e ta referi na esaki: “Cu Aruba no a institui un Ombudsman ainda lo pasa pronto pa pasado. Esaki sigur, si tene na cuenta e fase den cual e ley ta, cu den e programa di gobernacion e institucion di un Ombudsman ta wordo explicitamente menciona, cu tin presupuesto disponibel, cu e urgencia y diligencia di parti nos organo di mas halto, esta Parlamento, pa cu e introduccion di un Ombudsman pa Aruba”, e reaccion di gobierno ta sigui bisa. Riba CN mientrastanto ta cita Kelly bisando cu “Arubianonan ta expresa nan mes si riba social media y radio, pero no tin un persona specifico cu ta sali na nan defensa”. Kelly den e reaccion via gobierno ta lamenta cu e reunion a laga e puntonan ‘positivo’ afo den e articulo di CN, pero no ta desmenti e citadonan cu el a haci y cu CN ta usa di dje. E potret ta di CN