Polis a gara dos sospechoso cu a comete atraco

ORANJESTAD - Polis a gara sospechosonan cu a comete atraco. “Nos a avisa for di masha tempo caba, cu e chens pa polis gara bo ta hopi mas grandi awendia, debi na mas Polis, miho ekipo pa traha cune y mas conocemento den cas. Cu asina mes tin hende ta purba nan suerte, ta conduci na detencion”, asina Lito Lacle, vocero di Cuerpo Policial Aruba a duna di conoce den fin di siman, ora cu a bira conoci cu polisnan a logra detene dos sospechoso di casonan di atraco arma riba nos isla.

Den un forma organisa, bon planea y aplicando un strategia cu a conta cu participacion di varios departamento di polis, a sali diabierna anochi cu un grupo di mas o menos 60 Polis riba pia. Na dado momento a topa cu un auto cu dos sospechoso aden, di cual ta sospecha cu nan ta comete atraco riba nos isla. Polis a para nan cu exito.

Polis a bin topa cu arma di candela, mascaradanan cu ta uza ora di comete atraco y tambe articulonan cu ta parce procedente di ladronicia. E sospechosonan ta di inicia K.T. di 26 aña di edad biba den Katunastraat y I.L. di 25 aña di edad biba na Primavera. A presenta ambos sospechoso dilanti Fiscal Auxiliar cu a ordena nan encarselacion mesora, pendiente e investigacion andando.