UB40 a yega Aruba y ta cla pa presenta diabierna na Harbor Arena

PALM BEACH – E grupo legendario di reggae UB40 a yega Aruba y a tene un conferencia di prensa diahuebs den Marriott Resort. Ta trata di e integrantenan autentico di UB40 esta Ali Cambell y Astro. E cantantenan ta contento di ta bek na Aruba despues di 25 aña. Nan a comparti cu e show cu nan lo presenta lo ta un ‘Greatest Hits’ show. Esta cu e publico lo sa di canta tur cancion nan. Nan banda completo tambe a yega Aruba y diahuebs tambe a hasi nan chekeo di sonido cual a zona hopi bon.

Mester comparti cu no tin hopi carchi mas disponibel mirando e diferente generacionan cu ta bayendo e evento. Diabierna durante dia e otro artistanan lo ta yegando manera, Sech, Lunay, Alex Sensation, Dimelo Flow y Chris Jeday. Jeon tambe Tabata presente na e rueda di prensa y comparti cu e mes y su team a traha duro pa un show completamente nobo cual Aruba lo sa di e disfruta di dje.

Algun minuut promer cu e rueda di prensa algun fanatico fiel di UB40 ft Ali Campbell & Astro a logra topa y saca potret cu e cantantenan. Nan a gana esaki via diferente radio emisora. Tambe e banda firma dos guitara cu lo tin un proposito pa recauda fondo pa un bon causa. Aruba Tourism Authority den representacion di Sr. Patrick Melchiors a jama e banda Bon Bini na Aruba y ta spera cu nan lo disfruta di nos isla.