Aeropuerto ta cera e tereno usa pa ‘free parking’ entrante December

ORANJESTAD – Entrante 1 di December proximo, e tereno dilanti aeropuerto, cu actualmente ta wordo usa pa parker auto ‘gratis’, ta wordo cera. Esaki kier men cu no por use mas como parkinglot ‘gratis’. Consecuencia ta cu esnan cu normalmente ta usa e lugar, tin cu usa parkinglot normal di pago. Solamente cu e prijs pa parkeer lo baha pa asina compensa pa esaki. Motibo ta pasobra aeropuerto mester e tereno pa continuacion di e expansion di aeropuerto Gateway 2030. Asina vocero di aereopuerto Hendrik Croes a confirma diahuebs merdia. 

CONSTRUCCION

Aeropuerto ta den proceso pa scohe un contratista pa e siguiente fase cu ta cuminsa cu e parti ey na comienso di otro aña, esta januari 2020. Esey ta ensera cu e contratista tin su ekiponan di construccion cu e ta bay trece na e sitio pa haci e proyecto. Aeropeurto tin cu prepara e area cu e contratista por pone su ekiponan pa e por traha. Como tal, entrante 1 di December e espacio destina pa esaki ta esun dilanti aeropuerto. Tanto pariba y pabou , tin dos areanan grandi cu ta cera cu baranca, pero cu tin hopi auto ta parkeer. Riba un diasabra asina, e por yega na un 500 auto cu ta usa e facilidad ey. Esaki ta e area publico cu no ta cobra pa parkeer. E area menciona lo no ta disponibel pa por lo menos tres pa cuater aña.