30 aña di Tratado Internacional di Derecho di Mucha

ORANJESTAD - E aña aki, mundo henter ta para keto na e momento historico cu a tuma lugar 30 aña pasa, na unda lider mundial a yega na un acuerdo den un asamblea general di Nacionnan Uni cu globalmente lo salbaguardia e bienestar di tur mucha, pa medio di e Tratado di Derecho di Mucha. E tratado aki ta un di e tratadonan di derecho humano ratifica door di mas pais na mundo. Tin hopi mas atencion pa proteccion di mucha, pa nan por desaroya na nan maximo potencial, pa medio di e 54 articulonan den e tratado. Nos por wak bek riba un transformacion den bida di nos muchanan rond di mundo, ehempel di esaki ta un reduccion di 50% di mortalidad di mucha bou di 5 aña, mesun cos ta conta pa disminuicion di e cantidad di mucha malnutri y un aumento den e cantidad di mucha cu tin acceso na awa limpi pa bebe. Esaki ta djis pa menciona algun di e avancenan raporta door di UNICEF. 

Na aña 2001 Aruba tambe a firma e Tratado aki, haciendo asina e compromiso pa protega, di un forma mas completo posibel, e mucha pa medio di e diferente articulonan specifica den e tratado. E mesun aña ey, gobierno di Aruba a instala e Comision Nacional Derecho di mucha, pa percura cu e cumplimento di e Tratado ta sosode na un forma coordina y eficiente. E comision Derecho di mucha ta consisti di 8 organisacion gubernamental y 2 organsacion no-gubernamental.

Sinembargo ainda tin basta trabou pa haci, si nos wak e situacion na Aruba mes. Awendia ainda tin mucha ta biba den un of otro forma di violencia. Gobierno di su parti a pone e punto aki halto riba agenda pa medio di e Crisisplan Social. Un plan cu tin 31 proyecto dirigi specificamente pa mehora e situacion di nos muchanan.

Pero ta tuma mucho mas cu e boluntad di un gobierno, pa logra un generacion mas amplio, unda tur mucha tin tur derecho. E ta un compromiso cu mester ta carga door di tur sector y tur grupo den nos sociedad. Na Aruba tin hopi iniciativa pa pone e atencion riba e bienestar di nos muchanan pa medio di e tratado. Den enseñansa, e maestronan di scol ta haci esfuerzo extra pa educa e muchanan mes, pero tambe tin iniciativa for di e area di deporte y for di e diferente fundacionnan cu ta haci trabou incansabel pa promove e derechonan. Sin lubida sector priva, cu na diferente forma ta mustra nan sosten.