A drecha blok 2 pa aloca ex minister di Corsou Jamaloodin den SDKK

WILLEMSTAD –  ‘Na cualkier momento lo trece ex minister di Corsou George Jamaloodin Corsou pa e sinta su castigo den SDKK’. Asina e matutino Extra a raporta diaranson den forma di primicia. Mientrastanto e matutino ta raporta mientrastanto diahuebs cu  mester indica cu tur cos ta mustra cu awe den e oranan di dia, Jamaloodin lo yega Corsou. Ya a drecha blok 2 den SDKK pa aloca Jamaloodin.

Despues cu e informe aki a bira conoci den media, Ministerio Publico a saca un comunicado di prensa relaciona cu Traslado di Jamaloodin.

Den nan comunicado, Ministerio Publico ta añadi cu en conexion cu noticia y e preguntanan den e medionan local, encuanto un posibel traslado di señor G. Jamaloodin for di prisonn na Boneiro, Ministerio Publico ta informa, nos ta cita, ‘cu punto di salida ta cu e personanan cu a comete un echo castigabel na Corsou y cu tambe a haya un condena na Corsou, tin di sinta nan castigo na Corsou.

Esaki ta conta tambe pa e personanan cu ta sospecha di a comete un echo castigabel aki na Corsou y cu ta sintando un detencion preventivo, en espera di tratamento di nan caso.

Esaki por ta diferente, si pa motibo di seguridad, ta considera necesario pa aloca e persona en cuestion den un otro instituto den Reino,’ fin di cita.

Te na e momentonan aki no tin niun indicacion cu pa motibo di seguridad, lo no por aloca Jamaloodin aki na Corsou. Te asina leu cu e informenan cu a yega na EXTRA ta mustra, cu no tin niun menasa den su contra, segun nos fuente.

Mester indica cu e nota di Ministerio Publiko no ta menciona concretamente cu Jamaloodin ta na caminda pa Corsou of no, ni ki dia e ta yega, si esey ta e caso.

For di e fuentenan cu EXTRA a papia cu ne, ta haci mencion cu a prepara blok 2 pa Jamaloodin. Esaki ta crea e impresion cu, kisas en berdad e lo keda aki na Corsou y lo no regresa Boneiro.

Aunke cu tin un otro version ta bisa cu Jamaloodin lo ta na Corsou pa algun dia, relaciona cu e caso den apelacion.

Tin un silencio di parti di e autoridadnan relaciona cu e posibel traslado di Jamaloodin pa Corsou.

No ta conoci tampoco si ta un peticion di parti di Jamaloodin of ta un decision di parti di Ministerio Publico.

Cortesia EXTRA.