Oduber: Declaracion di GM di Canadian Bank Note Aruba NV no ta cuadra!

ORANJESTAD – E informacion cu e Gerente General di Canadian Bank Note Aruba NV, Roland van den Berg a duna noticiacla.com no ta cuadra, segun minister di deporte Dangui Oduber. “Mi a tuma nota di e declaracion di Gerente General di Canadian Bank Aruba caminda e ta bisa cu 90% di tur entrada ta keda Aruba. Hopi sorpresa cu e declaracion aki paso obviamente esaki no ta cuadra at all” Oduber ta bisa e portal aki. “Nos tin e prueba cu Canadian Bank Note a gana na anja 2017 11 miyon florin” e mandatario a sigui bisa. 

CUANTO PLACA 

Oduber a reacciona riba e articulo di noticiacla.com unda cu e gerente general di CBNA ta sigura cu por lo menos 90% di e placa cu e ta genera, ta keda Aruba. Segun Oduber, di un entrada di 54 miyon na anja 2017 cu ta wordo genera por medio di benta di Lotto, deporte a haya 4 miyon florin. Lotto mester paga premio, personal y gastonan di operacion y despues di kita tur otro gasto “ganashi” di e Canades nan tawata 11 miyon florin.  “ Awor con bo kier bin bisa mi cu 90% di tur entrada ta keda Aruba. E unico manera cu e por ta keda Aruba ta cu e ganashi logicamente ta wordo haci pa e sucursal di Canadian Bank Cu ta Canadian Bank Note Aruba” Oduber ta bisa.“ Na su turno logicamente e compania Arubiano ta traspasa tur e placa pa su compania madre. Kiermen no bin hunga cu inteligencia di nos hendenan y bisa cu 90% di e placa ta keda Aruba pasobra esaki simplemente no ta cuadra y ta un mentira flagrante pa tapa e hecho cu e reparticion di e entradanan no ta husto!” Oduber ta sigui bisa.

NO CONTRADECI

Hecho ta segun Oduber, y esey segun e mandatario, no por a wordo contradeci pa e gerente general ta cu Canadian Bank Note ta haya  tur e bolo cu mester wordo reparti pa deporte y deporte mes ta keda cu kruimels di e benta cual segun e mandatario, no ta husto! “Nos insistencia ta pa deporte haya su fair share pasobra na e momentonan aki esey no ta e caso cual nos ta lamenta profundamente!” Oduber a bisa finalmente.