CBNA: Ponencia cu Lotto no ta duna suficiente placa na deporte no ta corecto!

ORANJESTAD – E ponencia cu Lotto no ta dunando suficiente placa na deporte, no ta corecto. Asina Gerente General di Canadian Bank Note Aruba NV (CBNA) Ronald van den Berg a bisa noticiacla.com den un forma di primicia. Mientras cu e ta sigura cu nunca no tabatin miedo pa duna informacion, ta awor cu e portal aki a acerc’e, el a duna splicacion. Vd Berg kier clarifica varios mal informacion cu ta circula pafo y cu por perhudica e compania. Porta e asunto cu mas clarificacion mester, ta cu tin e Fundacion Lotto pa Deporte cu ta fundacion di gobierno, (FLPD) y tin e compania CNBA, cu ta opera benta, distribucion y maneho di e loteria financieramente, uzando e licencia di Lotto.

REPARTICION DI PLACA

Van den Berg a bisa cu mayoria placa cu Lotto ta genera no ta bay pa Canada. E ta sigura cu  aproximadamente 90% di e placa genera, ta keda Aruba. Berdad ta, cu ta un negoshi nan ta maneha y e negoshi tambe mester gana placa. “Na fin di dia, ta un negosacion tabatin, acuerdo tin ‘in place’ y semper cuando nos a bisa e ‘license holder’ cu si nan tin un problema, cu con e situacion ta of e reparticion di placa ta, nos mester bin na mesa pa papia” vd Berg a bisa. Pues cu esaki e ta mustra cu tin un acuerdo firma di cuanto placa CNBA tin cu duna Lotto. Si nan kier of mester mas, nan tin cu bisa of negosha esey. “Tur gobierno cu nos a traha cu ne, sa ken CBN ta. Nan sa con CBN ta traha. Semper nos ta yega na mesa. Anytime. Even si nos haya un yamada awe pa papia cu gobierno, nos ta sinta papia cu gobierno” vd Berg a sigui bisa. 

KEHO CU LOTTO TA STRICA MIYONES    

Un di e critica cu tin ta cu Lotto ta strica placa, mientras cu duna apenas un suma chikito na Fundacion Lotto Pa Deporte. V/d Berg ta mustra cu segun e contracto cu CBNA tin, nan tin cu duna Lotto minimal 4 miyon florin pa aña, y por tin e sumanan adicional cu CNBA ta duna, cu por ta di surplus cu e compania a haya y cu no ta keda cu ne, sino ta duna Lotto. Pero despues cu CNBA mes a saca un comunicado recientemente, nan a haci publicacion di entre otro cu entre 2012 y 2018 nan a paga FLPD e suma di 25.5 miyon florin, un di esnan cu a critica esaki, ta e mandatario responsabel pa deporte Dangui Oduber. Entre e comentario poni, e mandatario ta puntra cu ta bon pa Parlamento di Aruba puntra CBN si e reportacion aki ta husto pa Aruba y si nan a strica 72 miyon florin entre 2012 y 2018, mientras a paga Lotto solamente 25 miyon. “E no ta klop” vd Berg a bisa. “Tin otro cos cu nos mester paga tambe. E ta varia. Nos tambe a les’e”, vd Berg a bisa di e critica di e mandatario. “Con bo ta reacciona?” e portal a ki a puntra vd Berg. “Mi no por reacciona pasobra e calculacionnan ey, no ta bon. Esey ta prome. Pero mi por bisa si, for di un florin, 90% ta keda Aruba” vd Berg a bisa. E ta mustra cu tin hopi cos cu nan tin cu paga. Vd Berg ta referi na e.o. BBO cu mester a cuminsa paga dos aña pasa. A pone riba nan, y nan a pag’e. Ademas mester paga operacion, comisionan na rebendedonan, premionan y mucho mas, banco tambe pa paga bek.