Sindicatonan kier proposicion realistico pa indexering pa diabierna

ORANJESTAD – E grupo di sindicato SEPPA, SPA, SIMAR, SADA y TOPA a duna gobierno te diabierna pa presenta un propuesta nobo, uno ‘realistico’ pa cu pago di indexering. Asina e sindicatonan a manda bisa gobierno diamars den un carta cu ta den poder di noticiacla.com. E sindicatonan ta haci mencion di tres punto. E prome ta unda cu nan ta ‘rechasa e prome oferta categoricamente’, mientras cu e di dos ta cu nan punto di salida ta keda 3.6% y cu nan kier algo ‘realistico’, y finalmente, e proposicion mester ta cla pa diabierna pa nan por cuminsa negosha diabierna mes. 

ACCION

Ta sinti cu e sindicatonan no ta dispuesto pa wordo wanta mas na liña, y ta cla pa bay accion si mester. Por lo menos 3 di e 5 sindicatonan a indica na e portal aki cu nan ta cla pa bay e lucha, y cu nan ta bay all out. Di otro banda, nan lo kier sinta un biaha mas cu gobierno y duna un chens mas. E sindicatonan a haya un 'baño di awa friew' diabierna cu un proposicion cu ta carece di tur realidad posibel. Un proposicion cu ta drenta na vigor te aki 6 aña, y basa riba un porcentahe hopi abou di otro 'toelage' cu no ta inclui den salario, sino pafor. Y pa e sindicatonan esaki no ta aceptabel pasobra ora cu bay cobra pensioen, e aumentonan di e toelage no ta keda conta acerca. Como tal nan kier e wordo hinca den e salario pa asina e suma subi y cu nan por haye despues como pensioen tambe.