Imelda Kleuterschool ta cera pa mantencion y Reina Beatrix ta habri

ORANJESTAD - Imelda Kleuterschool lo cera dialuna pa trabaonan di mantencion y Reina Beatrix su alumnonan por cuminsa scol bek, pero na dos otro localidad. Esaki ta un otro situacion di scol cu ta cera pa motibo di mal estado cu e scol ta aden. Di otro banda e mandatario di enseñansa Michelle Hooyboer Winklaar a informa tur mayor cu scol ta cuminsa bek dialuna 1 December 2014 na YMCA y Doc Opleiding. E biaha aki si. “ Awor mi lo focus den drecha e edificio bieu di Beatrix School mas lihe posibel pa nan por bay bek nan scol", e mandatario a termina bisando.

Na comienso di siman e mandatario durante un reunion interno a wordo notifica di un situacion infrastructural cu ta reinando na Imelda Kleuterschool. Mes ora e la duna opdracht na su team encarga cu infrastructura y aki hunto cu DOW a bishita e scol pa asina aki haña un miho bista kico e situacion en realidad ta. En berdad ta e caso cu a constata cu den e lokaal nan tin humedad, ta hole muf, tin presencia di schimmel cual por tin efecto riba e salud di e studiante y docentenan."Atrobe mi ta haña mi den un situacion dificil caminda mi mester a opta pa cera un scol 2 siman prome cu kerst vakantie", e mandatario a informa. "Pa tur loke cu mi a wordo informa y a constata y teniendo cuenta cu mi semper lo pone salud y bienestar do maestronan y alumnonan no ta keda otro opcion".

Den e siman entrante DOW lo termina e opname pa wak kico tur por wordo drecha durante e 4 siman nan cu tin nos dilanti y wak kico por warda te zomer vakantie. Ta dificil elabora riba kico tur mester wordo drecha na e momento aki ya cu e rapport di DOW no ta full cla y tambe nos ta wardando e resultado di nulmeeting cu a laga haci.

Pa loke ta Reina Beatrix, a haci tur lo posibel pa por a aloca e scol mas lihe posibel. Aki a split e scol cu ta consisti di 12 klas entre DOC Opleiding y YMCA Dakota. A haci tur esfuerso pa a purba habri e scol bek siman pasa pero debi na diferente circunstancianan cu nos a enfrenta a dicidi di verschuif esaki cu 1 siman mas.

Hooyboer, encarga cu enseñansa ta hopi contento cu awe e por informa cu tur cos ta cla. Klas 1 y 2 a wordo aloca na YMCA y klas 3 te cu 6 ta na DOC Opleiding. "Mi meta semper ta pa studiantenan perde menos dia di scol posibel den caso nan manera esaki. Ta cos nan imprevisto. Pero si semper teniendo nan salud y siguridad na prome luga"."Nos lo haci tur lo posibel pa scol start bek dia 5 Januari 2015 den un scol completamente limpi di schimmel", e mandatario a declara.