Sindicatonan a rechasa proposicion di gobierno riba indexering

ORANJESTAD – E bloke di sindicatonan cu ta bringando pa indexering esta SPA, SADA, SIMAR, TOPA y SEPPA ta rechasa e proposicion di gobierno. Por lo menos dos di nan, SADA y SIMAR a confirma esaki mientras cu nan a informa cu ta tur a rechasa e proposicion. Ta keda awor na e miembronan di sindicato kico e siguiente paso ta. 

REUNION

Manera noticiacla.com a raporta caba ayera, mayoria di e sindicatonan a reuni den nan seno dialuna mientras algun a haci esaki den fin di siman caba. Esaki despues cu diabierna ultimo gobierno a duna nan un oferta finalmente. A tarda basta, pero e oferta a drenta, y awor ta keda na miembronan di e respectivo sindicatonan pa wak si nan ta acepta esaki si of no. Informacion cu e sindicatonan a duna, ta cu gobierno ta dispuesto pa atende cu indexering pa 2025, pues aki 6 aña. Mientrastanto ta dispuesto pa ahusta cierto acuerdonan awor, pa asina toch compensa e sindicatonan. 

OFERTA

E acuerdo ofreci, ta papia di un aumento di 0.6% di e voorjaars, najaars y reparatie premie. Hunto esaki ta acumula na 303 florin pa aña pa cada trahado. Ambtenaarnan lo haya liber riba nan cumpleaños. Si nan dia liber cay riba un dia liber caba, e siguiente dia ta bira liber pa nan. Pero pa enseñansa esaki ta bira mas dificil, pues esaki ta cambia pa un dia di enseñansa cu ta acompla na e hersftvacantie. Acerca, gobierno kier purba un areglo pa pensioen delanta pa trabounan extra duro. Tambe un flexibilisacion di acuerdonan di trabou unda cu un part time por bira un opcion. 

REACCION

E prome reaccion di e sindicatonan no tabata mucho entusiasma. “E no tabata mucho denderend’ e lider sindical di SIMAR, Josephine Albertus a bisa e portal aki ora cu nan a ricibie diabierna. Ayera nochi nan a reuni den nan seno y a rechasa e oferta formalmente. A compronde cu e sindicatonan lo bin afo cu reaccion di e miembronan, y wak kico esaki ta bira finalmente. Awor cu a dicidi cu no ta acepta e oferta, tin cu dicidi si tin suficiente motibo pa sigui negosha, y of si ta dicidi cu esaki no a aceptabel pa cual no ta descarta accion.