ATA/AAA/MINTUR: Taxistanan a malinterpreta aviso di JetBlue vacations

ORANJESTAD – E propaganda di JetBlue Vacations recientemente a wordo mal interpreta pa taxistanan na Aruba. Asina Aruba Tourism Authority, Ministerio di Turismo, y Aruba Airport Authority N.V. a informa dialuna anochi. Esaki despues cu nan a sostene dialogo entre nan mes referente informacion cu a wordo publica riba rednan social diabierna ultimo. Esaki ta trata e gremio di taxista cu a mustra preocupacion pa un aviso cu a sali referente un oferta di JetBlue Vacations. E tres instancianan a dicidi di provee informacion pa asina brinda informacion corecto y relevante referente e topico aki. 

MINISTER 

Mester bisa cu tabata minister di turismo Dangui Oduber cu a reacciona riba e noticia aki, como sorprendi, ora cu e portal aki, noticiacla.com a puntre pa su comentario durante fin di siman. Den su declaracion inicial, el a mustra cucu e no tabata na altura di e informacion y cu esaki no ta corecto, esta cu JetBlue lo ta haciendo esaki perhudicando e mercado di transporte di taxista. E reaccion riba e comentario aki tabata hopi, unda cu esnan riba tereno di turismo, a reacciona mesora bisando cu esaki no ta nada nobo, esta e tipo di dealnan aki, unda cu companianan local ta wordo usa pa transporta pasaheronan di cierto aeroliñanan. 

Bek pa e comunicado di clarificacion, segun e instancianan menciona, durante 2018, e aerolinea JetBlue a transporta un total di 217.343 bishitante ‘stay-over’ pa nos isla, cual ta 9.3% mas compara cu 2017.

Mescos cu e otro aerolineanan cu ta trece bishitante pa Aruba, ta comun cu cada aerolinea tin un division di actividadnan di ‘tour operator’ cu ta promove/bende pakete di vacacion pa e destinacionnan unda e aerolinea ta bula. Paketenan asina ta inclui ticket pa bula pa e destinacion cu e aerolinea specifico, y acomodacion. Hopi di e paketenan aki ta inclui e transportacion di aeropuerto pa e acomodacion y hasta di acomodacion bek pa aeropuerto. Esaki ta algo comun no solamente pa Aruba, pero pa otro destinacionnan tambe.

PORCION MINIMAL

Segun informacion cu Noticiacla.com a ricibi, den e caso di JetBlue (pero cu otro aerolineanan tambe) benta di e asientonan aereo pa medio di e division di ‘tour operator’ ta representa un porcion minimal y hopi chikito di e total di asientonan bendi. Esaki ta importante pa tene na cuenta, como cu e propaganda cu a wordo publica ta di e ‘tour operator’ esta di ‘JetBlue Vacations’ cual ta un division/subsidiario di e aerolinea JetBlue pero cu ta inclui e vuelo cu e avionnan di JetBlue. Esaki kiermen cu no ta tur asiento (e 217.343 asiento y mas) riba e vuelonan pa Aruba ta inclui e transportacion for di nos aeropuerto pa nan acomodacion. 

MALINTERPRETA 

Segun e comunicado, aunke e propaganda ta mustra bon cla cu e aviso ta di e ‘tour operator’ JetBlue Vacations, lastimamente esaki a wordo malinterpreta y a duna di kere cu e aerolinea JetBlue lo a duna tur esnan cu bula cu nan aerolinea transportacion pa nan hotel for di aeropuerto, impactando negoshi di nos taxista. Na ta sigui bisa cu tambe ta bon pa menciona cu e promocion di e ‘tour operator’ ta pa esnan cu ta reserva e pakete aki y cu den practica kiermen cu lo tin suficiente negoshi pa taxistanan manera cu e ta na e momentonan aki. 

“ Nos ta consciente di e preocupacionan serca e taxistanan y sigur ta tene debido cuenta cu esaki tambe. Ministerio di Turismo, Aruba Tourism Authority y Aruba Airport Authority N.V. ta spera cu e informacion aki lo trece aclaracion pa loke ta e manera con a interpreta e aviso di JetBlue Vacations” e comunicado ta finalisa bisando.