Wever: A baha overtolligheidspool di gobierno cu 43 persona

ORANJESTAD – Gobierno di Aruba a baha e ‘overtolligheidspool’  di 73 persona te na 30. Esaki kier men cu a logra saca 43 persona cu aworaki sea a haya un trabou den gobierno, a dicidi di retira of a haya nan retiro. Pa cu e 30 cu falta, ta buscando un alternativa ainda. Asina premier Evelyn Wever Croes a bisa durante un conferencia di prensa dialuna. Cu esaki, ta spera di logra reduci e gastonan di personal un poco, conforme e colegio di supervision financiero CAFT. 

OVERTOLLIGHEIDS POOL

E asina yama overtolligheidspool, ta un grupo di ambtenaarnan cu a wordo manda cas mientras nan tawata wordo paga. Sea e gabinete na mando no ta simpatisa cu nan, of nan no ta simpatisa cu e gobierno, y tin porta cierto posicion clave cu mester wordo yena pa hende di confiansa, of simplemente no ta gusta pa e gobierno. Tur gobierno a haci mescos, pero ta mustra awor cu Gabinete Wever-Croes desde e principio di gobernacion no a acepta cu mester paga hende mientras nan no ta trahando siendo cu tin cu baha gasto di personal.  E deseo sigur di Wever ta cu esaki ta na 0 sinembargo e leynan pa yega e ultimo fase no ta ‘in place’ ainda pa motibo di otro prioridadnan cu a pone cu e leynan mester a warda. Gobierno ta trahando pa logra pa e 30 personanan aki tambe wordo ubica den departamentonan of tuma nan retiro for di servicio di Gobierno. 

OVERTIME

E tema di overtime tambe tawata un tema di preocupacion cerca CAFT. Den curso di e aña aki, hunto cu CAFT, Gobierno di Aruba a bay di acuerdo pa haci un analisis di e gastonan di overtime den Gobierno na unda cu a sinti un corelacion entre AO halto den Gobierno y Overtime halto den Gobierno. Hopi ta esnan cu ta bay cu AO y consecuentemente demas colega mester traha overtime. Esaki sigur ta un desaroyo cu Gobierno no por sigui sostene. Gobierno tin varios proposicion riba mesa pa traha riba AO halto pa asina baha overtime. 

ANALISIS

Siman pasa, CAFT a presenta e rapport di e analis di gastonan di overtime den cuanan tin bon recomendacionnan concreto cuanan mayoria Gobierno tawata tin conocemento di nan caba y ta tene cuenta cu nan. Gobierno lo trata e resultado di e rappart cu e departamentonan concerni, cuanan ovetime ta hopi halto, entre otro Cuerpo Policial, KIA, Brandweer, Guarda nos Costa, Inmigracion. Despues di esaki, Gobierno lo publica e rapport. 

ESPACIO

Gastonan di personal ta keda dificil. Segun Wever, no tin hopi espacio. Pero mester baha e gastonan aki cu te e gastonan cu aña den aña fo ta keda subi aunke cu no bin niun ambtenaar acerca. Esaki pa motibo cu esnan den servicio di Gobierno ta keda haya aumentonan periodico y bevordering, Tambe e inhaalmanoeuvre di e negosacionnan di sindicato y e Gobierno anterior na aña 2014 na unda ta indica cu e voorjaarspremie y e najaarspremie ta keda subi cada aña. “Esaki kiermeen cu mientras bo e gastonan ta sigui subi, mester baha gasto, cu ta duna un presion extra grandi. Un reto hopi grandi pa Gobierno di Aruba atende cu n’e. Nos ta preocupa mescos cu CAFT sinembargo no tin motibo pa panico. Gabinete Wever-Croes ta manehando esaki. E aña aki tur cos ta mustra cu nos ta logra y cu mesun fe y determinacion, nos ta percura pa e logra otro aña tambe”, Wever-Croes a enfatisa.