Sindicatonan ta reuniendo riba oferta di gobierno pa cu indexering

ORANJESTAD – Sindicatonan SADA, SEPPA, TOPA, SPA y SIMAR cu ta bringando pa pago di indexering di 2018, ta reuniendo den nan seno awe dialuna. Esaki despues cu diabierna ultimo gobierno a duna nan un oferta finalmente. A tarda basta, pero e oferta a drenta, y awor ta keda na miembronan di e respectivo sindicatonan pa wak si nan ta acepta esaki si of no. Informacion cu e sindicatonan a duna, ta cu gobierno ta dispuesto pa atende cu indexering pa 2025, pues aki 6 aña. Mientrastanto ta dispuesto pa ahusta cierto acuerdonan awor, pa asina toch compensa e sindicatonan. 

OFERTA

E acuerdo ofreci, ta papia di un aumento di 0.6% di e voorjaars, najaars y reparatie premie. Hunto esaki ta acumula na 303 florin pa aña pa cada trahado. Ambtenaarnan lo haya liber riba nan cumpleaños. Si nan dia liber cay riba un dia liber caba, e siguiente dia ta bira liber pa nan. Pero pa enseñansa esaki ta bira mas dificil, pues esaki ta cambia pa un dia di enseñansa cu ta acompla na e hersftvacantie. Acerca, gobierno kier purba un areglo pa pensioen delanta pa trabounan extra duro. Tambe un flexibilisacion di acuerdonan di trabou unda cu un part time por bira un opcion. 

REACCION

Parse cu e prome reaccion di e sindicatonan no tabata mucho entusiasma. “E no tabata mucho denderend’ un lider sindical a bisa e portal aki ora cu nan a ricibie diabierna. Awe nochi nan ta reuni den nan seno. Otro sindicatonan a reuni caba den fin di siman, manera esun di doane SADA. SEPPA a reuni dialuna atardi laat. SIMAR ta reuni awe nochi. Despues di e reunionan, lo e sindicatonan bin afo cu reaccion di e miembronan, y wak kico esaki ta bira finalmente. Si ta acepta esaki, si tin suficiente motibo pa sigui negosha, y of si ta dicidi cu esaki no a aceptabel pa cual no ta descarta accion.