Gobierno a rechasa peticion di SAC pa organisa carnaval 2015

ORANJESTAD – Gobierno di Aruba a nenga e peticion di Stichting Arubaanse Carnaval pa haya e permisonan necesario pa carnaval 2015. Esaki a keda confirma diabierna atardi laat pa abogado di SAC, Darin Crouch y tambe pa polis na NoticiaCla.com. “Gobierno no a haya autorisacion pa duna SAC permiso”, e oficial halto di polis a confirma na NoticiaCla.com. Abogado Crouch y su colega abogado Jonathan Steward ta considera e acto aki di gobierno como un wega. “Gobierno tin miedo di confronta SAC den Corte. Esey ta tur e cuenta” Crouch a bisa NoticiaCla.com. E caso mientrastanto ta sigui diamars awor, y e abogado a añadi un voorlopige voorziening pa para e permiso cu SMAC lo mester a of a haya awor. Pasobra si SAC no a haye, esey ta nifica cu SMAC lo tin cu haye.

Tabata diabierna atardi cu abogado Crouch a haya notificacion di KPA cu e peticion pa permisonan di carnaval pa SAC a keda rechasa. Esey ta nifica cu gobierno a prohibi polis pa polis duna SAC un permiso. “Ta gobierno ta dicidi y polis ta ehecuta” e oficial halto di polis a bisa NoticiaCla.com. Di parti di abogado Crouch, e tabata basta indigna. “Gobierno ta actuando kinderachtig”. E ta argumenta cu gobierno ta uza e mesun ‘modus operandi’ manera biaha pasa. Apenas algun dia prome cu e caso, ta bin cu un acto cu tin cu ‘stroba’ e caso di tuma lugar. Biaha pasa gobierno a informa corte un dia prome cu e prome caso, cu no tin ningun permiso duna ainda na ningun organisacion y como tal un caso pa para e permiso, no ta valido. E biaha aki gobierno a haci mescos.

E caso di diamars tabata netamente pa obliga gobierno pa pone un fecha y pa anuncia ken ta haya e permiso di carnaval. Hunto cu esaki, tin e peticion pa no duna SMAC e permiso, argumentando cu no tin motibo valido pa no duna SAC su permisonan. E caso ta tuma lugar diamars awor 2 or di atardi, pero Crouch a adapta e peticion pa asina mustra huez kico ta loke cu gobierno ta purbando di haci.