Mas Polis riba caminda mester preveni mas atraco

ORANJESTAD - Mas Polis riba caminda mester preveni mas atraco. Asina polis ta manda su mensahe di fin di siman pa esnan cu tin pensa di comete algo illegal manera comete un atraco. Segun KPA, e aumento recien di atraco no ta un sorpresa. “E no ta nada nobo, pasobra ki ora yega temporada di fin di aña, mesora e casonan di atraco y ladronicia ta lanta cabes. Pero mescos cu otro añanan, nos tin e personal, ekipo y e preparacion pa enfrenta e menasanan aki”. Asina Lito Lacle, Vocero di Cuerpo Policial Aruba a enfatisa. E ta referi na e hecho cu awor cu ta final di luna di november, cu por spera mas casonan di ladronnan cu ta bira activo, saliendo di e punto di bista cu tin mas placa den circulacion.

Polis ta tene cuenta cu tin basta turista na Aruba e weekend aki relaciona cu “thanksgiving weekend”, tin premio grandi di Lotto, ta fin di luna y hendenan a cobra, cu tin varios compania cu a paga bonus caba of Gobierno cu a paga ambtenaarnan mas salario e luna aki. E consecuencia ta cu tin mas placa den circulacion, cu ta haci e ambiente mas fertil pa ladronnan.

Mientras cu di un banda Cuerpo Policial a percura pa aumenta e cantidad di Polisnan riba caretera y den areanan cu tin concentracion di negoshi, toch e comerciantenan tambe por tuma e precuacionnan necesario pa preveni ladronicia. Den esaki ta conseha tur hende pa check e Facebook di Cuerpo Policial Aruba cu tin algun guia di medidanan di prevencion facil cu por tuma pa desanima ladronnan den nan intento. Separa di stroba nan di horta, lo ta bon pa tin sistemanan di camara y otro forma pa por tin evidencia cu por yuda Polis despues pa gara e ladronnan.

Cuerpo Policial Aruba ta conta cu e sosten y ayudo di henter comunidad den e dianan aki pa hunto nos mantene nos isla mas sigur. “Nos t’ey pa proteha nos comunidad, pero nos ta conta cu comunidad t’ey pa yuda nos den cuadro di prevencion y tambe sigur cu informacion despues di un caso asina. Sin ayudo di pueblo ta dificil pa nos por soluciona casonan criminal”, asina Lito Lacle a sigura.