Minister sorprendi negativamente cu promocion Jetblue

ORANJESTAD - E promocion di e aeroliña Mericano JetBlue pa transporta su pasaheronan gratis pa hotel na Aruba a sorprende no solamente taxistanan na Aruba pero hasta e propio minister di Turismo Dangui Oduber. Asina e mandatario a bisa noticiacla.com diadomingo. "Obviamente e noticia aki ta nobo pami, y nos ministerio no tabata na altura di e promocion aki y di ningun decision di JetBlue pa haci esaki" Oduber a bisa e portal aki. Mesora el a manda un mensahe pa taxistanan.  " Logicamente nos mes hendenan y transporte publico local y especialmente nos taxistanan mester haya preferencia den transporte di turistanan di airport pa hotel" Oduber a bisa.

MAS INFO

Pa awor e mandatario no por a duna no por duna mas informacion. " Pasobra no ta algo cu gobierno a wordo poni na altura di dje". E mandatario ta bisa cu ta un promocion cu Jetblue a post riba social media. Y sigur esaki a trece tension y preocupacion bao di nos taxistanan" e mandatario a sigui bisa. Mes momento e ta sigura cu cos lo no keda asina. " Nos sigur lo busca informacion di esaki serca compania JetBlue" e mandatario a finalisa bisando. 

TAXISTANAN PREOCUPA

Tabata diabierna ultimo cu taxistanan a cuminsa hala atencion riba e.o. e asunto aki, fuera di mas asunto cu ta molestia nan riba aspecto di borchi y promocion cu tin poni varios caminda cu segun nan, ta perhudica nan. Esun di JetBlue ta un promocion cu ta bisa cu si pasaheronan book nan pasashi y hotel cu nan pa Aruba prome cu fin di e luna aki, nan ta haya transporte gratis di aeropuerto pa hotel. Nan lo por usa esaki te april di otro aña. Segun taxistanan, esaki ta nifica cu pa cada buelo, por lo menos 40 pa 50 taxista ta perde un biahe ya cu e aeroliña por usa tres bus pa buelo pa haci e transporte.