Lote di 2.200 kilo di cocaina a keda destrui awe mainta

SAN NICOLAS – Bou di auspicio di ministerio publico, e lote di 2.200 kilo di cocaina intercepta dia 14 di October ultimo, a wordo kima awe mainta riba un tereno na San Nicolas. Vocero di ministerio publico Ann Angela a confirma esaki pa noticiacla.com. Hopi informacion (aunke disponibel) no por a wordo duna, debi na e aspect di seguridad. Pero ta confirma cu awe mainta e lote a keda destrui. No kier a suministra potret pa no divulga e area unda cu e lote a keda destrui, pa motibonan di seguridad y represaya. Y potret lo por a divulga esaki.  Cu esaki un ‘pesadiya’ ta caba ya cu tabatin nervio pa esnan ‘doño’ di e lote no bin ‘busca’ nan droga, manera sa sosode. Ta usual cu ora cu un lote asina  cay den man di husticia, cu esnan doño ta bin ‘busca’ nan ‘cos’ y no ta ria pa autoridad cu tur consecuencia cu esaki por tin pa esnan cu ta ‘cuidando’ e lote confisca. Potret ta di archivo di noticiacla.com