Polis ta man na kabes ku kasonan di atraco

WILLEMSTAD-  Polis ta man na kabes ku kasonan di atraco! Asina e matutino Extra na Corsou ta raporta diabierna mainta. Segun e relato di polis un dia anterior, tin hopi factor ta determina e grado di seguridad den trafico na Corsou. Hopi tin di haber cu e comportacion di usuarionan mes y kizas lo mester haci mas adaptacion na nos infrastructura. Pero keto bay velocidad halto ta motibo di casonan fatal den trafico, mientras cu hopi die  causantenan ta hende relativamente hoben. Esey ta di acuerdo cu inspector Raymond Ellis ayera den un presentacion pa prensa pa loke ta cifra cu polis tin di aña 2019 te awor. 

Segun sr Ellis, definitivamente e comportacion di e chaufeurnan ta algo cu mester traha ariba. Velocidad halto mayoria biaha ta e origen. Pa loke ta trata ladronicia di auto, esaki a conoce su punto di mas halto na aña 2003, cu 554 caso, y despues di esey, el a conoce bahada y a keda fluctua un tiki y awe por bisa cu e ta hopi mas abou (197). 

ATRACO

Pa loke ta e casonan di atraco, segun sr Ellis a splica cu esaki a conoce su punto mas halto den 2003 cu mas di 500 caso. Despues di e aña ey, el a sigui baha. Pero na 2019 polis a nota cu tin un tendencia di subida atrobe (315). Ta atribuyendo esaki na e situacion economico y social di e pais, e tin di haber cu desempleo. Tin hopi hoben cu no ta bayendo scol, hopi hende husando droga etc. 

Polis cu ta esun mas cerca di e problemanan aki,   ta nota cu tin hopi cu ta comete delito cu ta residivista, pues nan ta bay cera, sali y comete otro delito pa motibo cu ora cu nan a sali, nan ta bin cay den e mesun circulo vicioso. Keto bay nan no tin scol, nan no tin trabou, nan no tin  cen, nan ta usa droga etc. Loke polis ta notando tambe, ta cu no obstante ta soluciona hopi caso di atraco, tur dia ta bin acerca, sea di hendenan nobo of esnan residivista. For di esaki Extra por conclui cu polis ta man na cabez cu casonan di atraco. 

Segun inspector Ellis, atraco tambe ta un di dje partionan di polis ta dedica hopi tempo pa soluciona, y prueba di esey ta cu den e departamento aki tin como 30 hende emplea (Atraco team), Tur dia ta trata di haci mas tanto detencion posibel pa soluciona casonan. Pero pa yega na solucion di casonan, polis ta haciendo uso di un analista cu ta analisa e diferente aspectonan y componentenan relaciona cu atraco. Por ehempel ta analisa cua ta e gruponan, edad,a rea, composicion di grupo. A base di esey por soluciona hopi caso. Hopi biaha tin factornan en comun cu ta pone cu por soluciona un caso. Te aki e relato di polis. 

Cortesia Extra.