APA ta lamenta insinuacionnan relaciona cu Proyecto Port City

ORANJESTAD – Den un comunicado pa prensa, Aruba Ports Authority (APA) NV ta informa cu nan a tuma nota di un publicacion di e partido politico RAIZ cu ta pidi intervencion di Prome Minister Evelyn Wever Croes, pa den e caso di e proyecto Port City. Segun e comunicado, gerencia di APA ta lamenta cu partido Raiz ta saca conclusion sin tin ningun tipo di informacion y conocimiento di e projecto aki. “Na ningun momento ningun representante di partido RAIZ a acerca gerencia di APA of Hunta di Comisario pa haya informacion y educa nan mes riba e Proyecto aki. Apesar cu e partido kier traha a base di integridad na prome luga, ta bira atacha credibilidad di un proyecto cu ta asina importante tanto pa APA como pa Aruba, mirando e impacto economico cu e lo bay genera, sin tin ningun conocimiento di esaki” e comunicado ta sigui bisa. 

Nan ta bisa tambe cu semper  APA NV a traha den un forma transparente y ta atene su mes na normanan di Good Corporate Governane y ta lamenta cu un partido politico ta trata di atacha esaki den un forma iresponsabel.

“APA ta spera cu RAIZ haci un analisis profundo, basa riba datonan concreto y combersando directamente cu APA, prome bay na difama un proyecto cu su desaroyo tin partnernan internacional envolvi den dje y cual proyecto, un biaha mas, ta bay estrictamente segun reglanan” e comunicado ta finalisa bisando.